Kyivdeki «Oskar» kinoteatrinde noyabrniñ 5-nde qırımtatar asıllı ukrainalı rejissör Nariman Aliyevniñ «Evge» filmi taqdim etildi.
Tedbirde Qırımtatar Milliy Meclisiniñ reisi Refat Çubarov, qırımlı ukrain rejissöri Oleg Sentsov, qırımtatar asıllı ukrainalı yırcı Jamala, Ukraina halq deputatı, yırcı Svâtoslav Vakarçuk, Ukraina halq deputatı, sportçı Jan Belenük ve digerleri bar edi.
«Filmimiz vastasınen Qırım, qırımtatarlar meselesini tek Ukrainada degil, çetelde de kötere bilgenimizge quvanam. Film üzerinde çalışqan taqımımızğa minnetdarım. Olarsız film olmaz edi. Çekimlerniñ birinci künü olarğa şöyle aytqan edim: leyhamıznı bitirgende onıñ üzerinde çalışqanıñıznı aytmağa utanmañız dep ister edim. Ümüt etem ki, utanmazlar, seyirciler utanmaz – iç birimiz ukrain kinosı içün utanmaycaq», – dep qayd etti taqdim merasiminde rejissör Nariman Aliyev.
«Bu taqımda çalışmaq – insannıñ zenaat bahtıdır, çünki çekim meydanında ve onıñ tışında er kes er şey olsun dep elinden kelgenini yapa. Ümüt etem ki, bir yerden, aman-aman patriarhal qırımtatar qoranta ikâyesi olaraq başlağan bu ikâye er keske añlaşılacaq. Film kösterilgende ya da ondan soñ duyğularnı pek körmege isteyim», – dep qayd etti filmde baş rollerden birini oynağan qırımtatar asıllı ukrainalı oyuncı Ahtem Seitablayev.
Daa evel Nariman Aliyev Qırım.Aqiqat Radiosınıñ yayınında «Evge» filmi içün oyuncılarnı nasıl saylağanını tarif etti.
Qırımtatar rejissöri Nariman Aliyevniñ «Evge» filmi oktâbrniñ 24-nde «Eñ eyi uzun film» nominatsiyasında «Kinokolo» Ukraina kinokritikleri milliy mukâfatını aldı.
Levha 7-inci Halqara Bosfor film festivaliniñ eñ eyi çetel filmi olaraq tanıldı.
Nariman Aliyevniñ filmi «Oskar» mukâfatınıñ long listine kirdi. Film, Odesa halqara film festivalinde gran-pri qazandı.
Aliyevniñ «Evge» filmi Cannes festivaliniñ «Ayrı bir baqış» yarış programmasınıñ iştirakçisi edi, Bükreşteki halqara kinofestivalinde eñ eyi film mukâfatını qazandı.
«Evge» levhası qırımtatarı Mustafa aqqında tarif ete. Eki oğlu Qırım işğalinden soñ Kyivge ketti. Büyük oğlu Nazim vefat ete, babası onı Qırımğa alıp, musulman ananelerine köre defin etmek ve küçük oğlu Alimni evge qaytarmaq içün paytahtqa yol ala.
Nariman Aliyev — qırımtatar rejissöri, «Qırım ikâyeleriniñ» (qısqa levha) müellifi. «Sensiz» filmi 66-ncı Berlin kinofestivaliniñ Generation 14+ çerçivesinde taqdim etilgen edi. Aliyev öz işlerinde qırımtatarlarnıñ qoranta munasebetlerini, anane ve turmuşını köstere.
