Ukraina aq qorçalayıcıları Qırım işğali başlağanınen jurnalist ve blogerlerge 300-den çoq kere basqı yapılğanını qayd etti. Bu aqta Qırım aq qorçalayıcı gruppasınıñ reberi Olga Skripnik PACE qış sessiyası çerçivesinde «İşğal etilgen Qırımdaki vaziyet ve insan aqları saasında Rusiye içün talaplar haritası» tedbiri vaqtında bildirdi.
Qayd etilgen vaqialar arasında cinaiy ve memuriy davalar, işkence, ücüm, tutuv ve tintüvler, sorğu, jurnalist donatmalarınıñ zapt etilüvi ve zarar ketirilmesi, Qırımğa kiriş yasaqları, tsenzura, mustaqil kütleviy haber vastalarına qarşı DDoS ücümleri.
«Qırımda Rusiye akimiyetiniñ areketleri fikirlerniñ çeşitligini yoq ete ve mustaqil kütleviy haber vastaları yerine resmiy Rusiye propaganda menbalarını ketire. Qırımlılar Ukraina ve Qırımda insan aqları meseleleri aqqında malümat almaq imkânından marum etile, çünki Rusiye kontrol etken kütleviy haber vastaları Qırım sakinlerinden böyle malümatnı gizley», – dep qayd etti Qırım aq qorçalayıcı gruppasınıñ reberi.
Avropa Şurası Parlament assambleyasınıñ qış sessiyası yanvarniñ 27-nde Strasburgda başlandı.
2014 senesi Qırım işğal etilgen soñ Rusiye quvetçileri bir qaç Ukraina jurnalistiniñ yarımadağa ve Rusiyege kirişini yasaqladı.
2016 senesi fevral ayında Rusiye FSBsiniñ hadimleri «Ukrayınska pravda» jurnalistiAnastasiya Ringisniñ Qırımğa kirişini 2020 senesine qadar yasaqladı. Rusiye quvetçileriniñ jurnalistke bergen vesiqağa köre, onı «Rusiye telükesizligi içün telükeli» dep sayalar.
2019 senesi fevralniñ 18-nde Qırım.Aqiqatnen işbirligi yapqan fotoressam Alina Smutkonıñ Rusiye işğal etken Qırımğa kirişi 2028 senesine qadar yasaqlandı. Smutko, yasaqnıñ sebebi onıñ zenaat işi oldı, dep bildirdi. Alina Smutkonıñ fotoresimi Radio Free Europe/Radio Liberty Culture & Traditions umumşirket fotoresimler yarışınıñ üç ğalebe işinden biri oldı.
2018 senesi noyabr ayında Rusiye FSBsi Qırım.Aqiqatnen çalışqan ukrainalı jurnalist Alena Savçuknıñ Qırımğa ve qomşu Rusiyege kirişini 2028 senesine qadaryasaqladı. Onıñ aytqanına köre, kirişi Rusiyege kiriş ve çıqış tertibine dair Federal qanunnıñ 27-nci maddesiniñ 1-inci qısmına köre («Devletniñ mudafaası ya da telükesizligi, ya da cemaat nizamı, ya da eali sağlığını qorumaq maqsadınen») yasaq etildi.
2020 senesi yanvar ayında Rusiye FSBsiniñ hadimleri Qırım.Aqiqat muarririyetinen işbirligi yapqan ukrainalı jurnalist Taras İbragimovnıñ Rusiyege ve onıñ işğali altındaki Qırımğa kirişini 2054 senesi mayısnıñ soñuna qadar yasaqladı. Jurnalistniñ aytqanına köre, yasaqnıñ sebepleri ne qararda, ne de ağzaviy şekilde oña bildirilmedi.
Jurnalistler Rusiye quvetçileriniñ böyle areketleri zenaat faaliyetlerinen bağlı, dep tüşüne. Alena Savçuk, Alina Smutko, Taras İbragimov Qırımda qırımtatar ve ukrain faalleriniñ taqip etilüvini muntazam sürette aydınlatqan ediler.
Ukraina aq qorçalayıcıları böyle yasaqlarnı Qırımdaki jurnalistlerge basqı dep saya. Olar işğal altındaki yarımadada söz serbestliginiñ sıñırlanmasını toqtatmaq içün dünya toplulığını Rusiyege qarşı basqı quvetleştirmesine çoq çağırğan edi.
