Aqmescitte qadı advokat Edem Semedlâyevniñ memuriy tevqifine qarşı berilgen istinaf şikâyetiniñ baqılması boyunca mahkeme oturışını qapalı keçirdi. Bunı advokat Emil Kurbedinov haber etti.
"Yançıq mahkeme oturışı yekünlendi, qadı mesleatlaşuv odasına ketti, anda saat 16:45-ke qadar bulunacaq. O zaman şikâyet ile bağlı qarar ilân etilecek. Edemni mında ketirdiler. Şimdi, añlağanıma köre endi keri alıp kettiler. Saat 16:45 kene qarar çıqarılmasına ketirecekler. Mahkeme oturışı qapalı keçti. Qadı mahkeme oturışını qapalı keçirgen, çünki pols hadimlerine sanki telüke bar eken", - dedi Kurbedinov.
Advokat Emine Avamileva, mahkeme Semedlâyevni ve oña qarşı memuriy protokolnı tizgen şahısnı sorğuğa çekti.
Noyabrniñ 11-nde Rusiye kontrolindeki Aqmescitniñ Kiyev rayon mahkemesi advokat Edem Semedlâyevni 12 künge apiske aldı ve Ekstremizm ile küreş merkeziniñ hadimlerinden biriniñ ögünde soyunmaqtan red etkeni içün 4 biñ ruble para cezasını berdi.
Cumaertesi künü, oktâbrniñ 25-nde, Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Daa soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.
