Büyük Britaniyanıñ Ukrainadaki elçiligi işğal etilgen Qırımda advokat Edem Semedlâyevniñ tevqif etilmesine qarşılıq kösterdi.
"Onıñ yañı 12 künlük tevqif etilmesi siyasiy mabüslerni daa da qorqutmaq ve adalet mahkeme aqqını sıñırlamaq içün yapıla. Rusiye Edemni ve bütün siyasiy mabüslerni azat etmek kerek", - dep bildirdiler elçilikte.
Çehiya elçiligi de Semedlâyevniñ tevqif etilmesini takbih etti,
"Bu, yarımadada basqılarnıñ devam etkenine ve insan aqlarınıñ muntazam tarzda bozulmasına delâlet ete. Biz Edem Semedlâyevni ve evel tevqif etilgen bütün siyasiy mabüslerni deral azat etmege çağıramız", - dep yazıla bildirmede.
Noyabrniñ 11-nde Rusiye kontrolindeki Aqmescitniñ Kiyev rayon mahkemesi advokat Edem Semedlâyevni 12 künge apiske aldı ve Ekstremizm ile küreş merkeziniñ hadimlerinden biriniñ ögünde soyunmaqtan red etkeni içün 4 biñ ruble para cezasını berdi.
Cumaertesi künü, oktâbrniñ 25-nde, Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Daa soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.
