Saqat olğan "Qırım musulmanları davası"nıñ mabüsi Aleksandr Sizikov pnevmoniyağa oğrağan. Bundan sebep dekabrniñ 8-ne tayin etilgen mahkeme oturışını başqa künge qaldırılğan. Bunı "Qırım birdemligi" cemaat birleşmesi haber etti.
Advokat Safiye Şabanovanıñ malümatına köre, müvekkili Sizikov dekabrniñ 6-nda yaramağan. O evine ekim çağırğan. Ekim acele MRT tayin etken. organlarda izin belemeyip, Sizikov acele hastahanege ketken. Anda bütün kerekli talilliyer yapılğan ve sağ taraflı pnevmaniya şübesi aşkâr etilgen. Tam diagnoz daa qoyulmağan, amma ekimler oña Covid-19-dan tedaviy tayin etkenler. Tedaviyden soñ ekimler bütün kerekli vesiqalarnı bermek vade etkenler.
Mahkemeniñ nevbetteki oturışı dekabrniñ 22-nde olacaq.
2021 senesi fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
