Saqta iyülniñ 7-nde sağanaq yağdı, suv taşqını oldı ve elektrikler kesildi, dep bildirdi şeerniñ yolbaşçısı Aleksandr Ovdiyenko.
«Şeer zor ava şaraitleriniñ merkezine oğradı. Sağanaq. Fevqulâde vaziyetler komissiyası toplandı. Vaziyet kontrol etile. Elektrik hatları kesildi – iş yapıla. Çoqusı internetsiz qaldı – cep telefonı bağını, mobil internetni qullanmağa rica etem», – dep bildirdi Ovdiyenko içtimaiy ağlarda.
Onıñ malümatına köre, eñ qıyın vaziyet Kolhoznaya soqağında oldı, akimiyet suv basqan yerlerden insanlarnı tahliye etip başladı.
Bir kün ögüne Qırımnıñ Rusiye Fevqulâde vaziyetler nazirligi iyülniñ 7-nde kün devamında küçlü sağanaqlar, boranlı yağmur, bazı yerlerde burçaq yağması beklenile, yel süratı saniyede 20-25 metr esecek, dep tenbilegen edi.
Yağanaqlar sebebinden Qırımda iyülniñ 4-nde Bağçasaray rayonındaki bir sıra meskün yerni suv bastı. Akimiyet suv taşqını sebebinden fevqulâde vaziyet rejimini kirsetti.
Bundan evel Qırımnıñ Rusiye Fevqulâde vaziyetler nazirliginiñ idaresi 2021 senesi iyünniñ 16-ndan 18-ne qadar küçlü yağanaqlar sebebinden Yaltada ve şarqiy Qırımda 426 azbarnı, 356 evni, 18 içtimaiy ceetten müim obyektni suv bastı, dep bildirgen edi. Umumen suv basqan yerlerden 1783 kişi tahliye etildi.
