Bir dane Ukrayına telekanalı qalmadı, Rusiye kanalları yayınlana. ATR qırımtatar telekanalına da qapatılacaq dep aytıldı. Qırımnıñ parlament spikeri Konstantinov qırımlılarnı referendumğa çağıra, Aqmescitte Rusiyege qoltutuv kontsertleri keçirile. Ukrayına arbiyleri hırsızlana, Ukrayınağa qoltutqan faaller ğayıp oldı, soñra işkencege oğrağanları belli ola. Aqmescit soqaqlarında ateş açıla: cumhuriyetniñ arbiy komissarlığı ögünde Avtomaydan iştirakçilerine ateş açıldı. Yaltada Rusiyege qoltutqan faaller, hususan Putinge qoltutqan «Noçnıye volki» klubınıñ baykerleri, miting iştirakçilerine ve jurnalistlerge ücüm etti. Ukrayınağa qoltutuv aktsiyaları er kün keçirile, amma olarnı dağıtalar. «Küç olarnıñ, olar işğalciler de, biz azmız», dep ayta 2014 senesi Yaltada Ukrayına bütünligine qoltutuv mitinginde iştirak etken qadın.
İnsan hırsızlavları, öldürüv, zapt etüvler. Şaatlarnıñ hatıraları
2014 senesi martnıñ 9-nda Qırımda arbiy bölüklerniñ zapt etüv dalğası başlanğan edi. Rusiye arbiyleri Canköydeki arbiy aerodromnı, Novofedorovkadaki uçuv yolağını kontrol altına aldı. Kyiv Devlet hazinesiniñ Qırım idareleriniñ elektron sistemasını qapatıp, muhtariyetniñ bütün esaplarını blok etti.