Qarasuvbazar rayonınıñ Keñ Toğay (Litvinenkovo) köyünde yaramay ava sebebinden altı mesken evni suv bastı. Bunı Qırımdaki Rusiye FVN-niñ idaresi bildirdi.
"Qaza yerine kelgende, bol yağanaqlar sebebinden altı mesken ev suvnen basılğanı belli oldı. Kirli suvnıñ çıqarılması içün qullanılğan motopompanı işletken qurtarıcılar, qaza aqibetlerini yoq etti", - denile beyanatta.
İyül 2-sinde Saqta yaramay ava sebebinden şeerniñ yarısı elektriksiz qaldı, 30-dan çoq terek yıqıldı.
Aqmescit rayonınıñ Biy Tanış (Pervomayskoye) köyünde 50 evni suv bastı.
Yarımadada eki aftadan berli yaramay ava qala. Aqmescit soqaqlarını eki kere suv bastı. Aqyarnıñ Kazaçya körfezinde küçlü yağanaqlar neticesinde topraq eşildi. Ekologlarnıñ ilk esaplarına köre, umumen 500 tonna topraq eşildi.
