Rusiye-Ukraina sıñrını Kyivniñ nezareti altına nasıl qaytarmalı? Bunı endi Minskteki iş gruppası çezmek kerek. Ukraina tarafı onı Üçtaraflı alâqa gruppası çerçivesinde yaratmağa teklif etti. Keçken teşebbüslerge, hususan "ORDLO ile mesleat şurası"nıñ yaratılmasına köre, bu, ukrain cemiyette keskin menfiy reaktsiya bermedi. Bu sefer muzakereciler er şeyni doğru yaptımı? Donbass.Aqiqat Radiosı mütehassıslardan soradı.
Ukraina, Rusiye, OSCE. "LDNR"lersiz
Prezidentniñ resmiy saytı Minsk añlaşmalarındaki Ukraina tarafınıñ teşebbüsi aqqında bildirdi. Anda, Ukraina tarafınıñ Ukraina ve Rusiye sıñrı ve gümrük hızmetleri vekilleri, bundan ğayrı OSCE ortacılarnıñ iştiraki ile Ukrainanıñ devlet sıñır qısmınıñ nezaretiniñ ğayrıdan qoyulması içün bir mehanizm azırlamaq içün iş gruppasınıñ yaratılması teşebbüsi kösterile.
Böyle gruppalarnıñ yaratılması imkâni belgilene
"Böyle gruppalarnıñ yaratılması imkâni Minsk añlaşmalarınıñ icrası içün tedbirler Kompleksiniñ 13-ünci maddesinde belgilene", - denile beyanatta. Tedbirler kompleksi ekinci Minsk kibi de denile, yani 2015 senesi fevral ayınıñ añlaşmaları.
Rusiyeniñ reaktsiyası ne olacaq
Vatandaş cemiyeti meseleleriniñ tetqiq etüv merkeziniñ analitigi Mariya Kuçerenko qayd ete ki: "ORDLO ile mesleat şurası"ndan farqlı olaraq, bu yalıñız Ukraina, Rusiye ve OSCE vekillerine aittir. Aslında, Üç taraflı alâqa gruppasında olğanı kibidir. ORDLO vekilleri aqqında asıl laf etilmey.
Başqa mesele şunda ki, böyle bir variantnıñ Rusiye tarafından qabul etilmesiniñ ihtimalı azdır, dey Kuçerenko. Bu, oturıştan soñ birden peyda olğan "LDNR" gruppalarınıñ beyanatlarında añlamaq mümkün. Mesleat şurasından farqlı olaraq, boyevikler, körüşüvlerniñ öyle olmasını isteyler ki, olarnıñ qararları bütün iştirakçiler tarafından imzalansın, şu sıradan boyevik gruppalarınıñ vekilleri tarafından da.Yani er şeyni Ukrainanıñ iç çatışması kibi köstermek ıntıluvlarıdevam etmekte. Bundan ğayrı, analitikniñ aytqanına köre, böyle beyanatlarnı evelkilerinden ayrı baqmağa qıyındır. Ukraina tarafı red etmegen "ORDLO ile mesleat şurası"nen beraber.
Teşebbüs artıq imzalanğan ve aytılğan şeylerden ayrı keteMariya Kuçerenko
"Teşebbüs yaramay da degil, yahşı da degil. Amma o artıq imzalanğan ve aytılğan şeylerden ayrı kete. İlk-evelâ Yermaknıñ protokolları aqqında aytam. Ve leyhasından keri çekilmek ihtimalı olmağan Dmitriy Kozaknı da degerlendirmeñiz. Bu onıñ üslübidir - Üçtaraflı Alâqa Gruppasına boyeviklerni kirsetip, ÜAG-nıñ bir qararınen, ÜAG-nıñ ne olğanınıñ añlamını bozmaq", - dey Mariya Kuçerenko.
Rusiyeniñ Donbasstaki pozitsiyalarını zayıflaştıra bileceginiñ iç bir alâmeti yoq
Prezident kabinetiniñ beyanatı - memleket içinde ORDLO vekilleri ile "mesleat şurası"nıñ yaratılması haberinden soñ ve deñişim meselelerinden soñ peyda olğan halqnıñ hoşnutsızlığını yazdırmaq içün bir "havuç"tır, deu arbiy ekspert Mihail Jirohov.
Onıñ fikrince, Kremlniñ, Andrey Yermaknı ve onıñ barışıq oğrunda ğayretlerini müsbet taraftan köstermek içün böyle bir adım atması mümkündir. Amma, ekspertniñ fikrine köre, böyle gruppa yaratılsa da, ep bir çalışmaycağınıñ ihtimalı büyüktir. Rusiye Minsk añlaşmalarınıñ öz şartlarında yerine ketirmelerini talap ete. Başta Anayasanıñ deniştirüvi ve saylavlarnıñ keçirilüvi, soñra qalğan sualler.
Añlaşmalarnıñ yerine ketirilmesi közde tutulsa edi, bu areket toqtatılır ediMihail Jirohov
"Rusiyeniñ Donbasstaki pozitsiyalarını zayıflaştıra bileceginiñ iç bir alâmeti yoq. Rusiyeniñ iç muzakeresi, Donbassnıñ Rusiye toprağı olması ile bağlı ve onı integratsiya yapmaq kerektir. Pandemiyağa baqmazdan, olar Rusiye pasportlarınıñ bermesini devam ete. Añlaşmalarnıñ yerine ketirilmesi közde tutulsa edi, bu areket toqtatılır edi", - dey Mihail Jirohov.
Bundan ğayrı, arbiy ekspert aytqanı kibi, bu kibi meselelerni başta "Normandiya formatı" çerçivesinde çezmek kerek. Bundan evel böyle teşebbüsler - yalıñız laftır.
