Bir yıl evelsi, noyabr 23-ünde 82 yaşlı Veciye Kaşka elâk oldı. Qırımtatar milliy areketiniñ veteranı, Rusiyeniñ FSB ve SOBR hadimleriniñ mahsus operatsiyasınıñ şaatı oldı. Aqmescit kafelerinden birisinde quvetçiler, Türkiye vatandaşı Yusuf Aytandan büyük para talap etkenlerinde qabaatlanğan dört qırımtatarnı tutıp aldı. Şimdi "dava" iştirakçileri tahqiqat altında buluna, Veciye Kaşkanıñ özü ise o künü elâk oldı. FSB-niñ resmiy rivayetine köre, adise şaatı olğan qadın yaramadı. Oña "acele yardım" çağırıldı, amma maşna onı hastahanegece alıp ketip yetiştirmedi - Veciye apte yolda can berdi. Qırım.Aqiqat, qırımtatar milliy areketiniñ qaramanı nasıl adam olğanını hatırlay.
Oña qaraman dey ediler. Bir yıl Veciye Kaşkasız (süret toplamı)
1
Veciye Kaşka 1934 senesi Qırımda doğdı. Doquz yaşlı bala olğanda, o qırımtatar halqı sürgünliginiñ bütün deşetlerini körüp keçirdi.
2
Sürgünlik yerinde Veciye Kaşkanıñ qorantası Özbekistanda, Taşkent yanında yaşay edi. Qadın ömür arqadaşı Bekirnen 1950-nci yılları qırımtatar milliy areketine qoşuldı. Başqa faalcilernen beraber o, qırımtatarlarnıñ tarihiy Vatanına - Qırımğa avdeti içün küreşti.
3
60-ıncı yıllarnıñ soñunda onıñ qorantası Qırımğa qaytmaq qararını aldı. Vatanında bulunıp, Veciye Kaşka ve başqa aile azarı daima sovet akimiyetiniñ basqınçına oğray edi. Olarnı Qırımdan üç kere sürgün ete ediler, amma olar teslim olmayıp, kene qayta ediler.
4
Belli sovet uquq qoruyıcısı Andrey Saharovnıñ şefaatı Veciye Kaşka ve qorantasına Qırımda resmiy qayd olunmaqqa yardım etti. Bunıñ içün Ceviye apte Saharoğa Moskovağa barıp yardım soradı
5
90-ıncı yılları Veciye Kaşka Qırımğa qaytqan vatandaşlarına yardım ete edi. Keyf kötermek içün o, qırımtatarlar sıq yaşağan qasabalarğa qurban qoylarını ketire edi. Keççe bu güzel bir adet olıp qaldı
6
Soñki yılları Veciye Kaşka, yaşına ve fenalaşqan sağlığına baqmayıp, qırımtatar halqınıñ aq-uquqları içün küreşini devam ete edi.
7
Qadın merasimlerde, miting ve konferentsiyalarda faal iştirak ete edi, qırımtatar siyasiy mabüslerine qoltutmaq içün o Aqmescit mahkemeleriniñ binalarına bara edi. 2017 senesi yanvar ayında Qarasuvbazar rayonına Veciye Kaşkanıñ evinde Andley Saharov hatırasına anma duası keçirilgen edi.
Facebook Forum