Keçken afta, avgustnıñ 19-nda, bir sıra Rusiye kütleviy haber vastaları, hususan devletke ait olğanlar, Ukrayina Tış istihbarat hızmetiniñ yolbaşçısı Rustem Umerov ABDde bir şirket idareyecisi ola, dep haber derc etti. Böyle malümat Qırım mediasında da peyda oldı.
"Ukrayina Milliy telükesizlik ve mudafaa şurasınıñ sabıq kâtibi, şimdi ise Tış istihbarat hızmetiniñ yolbaşçısı olğan Rustem Umerov 2026 senesi aprel ayında Ukrayina qabarcılıq ile küreş milliy bürosınıñ tahqiqatlarında olğan Floridadaki Asret Transportation LLC şirketiniñ idarecisi ve baş agenti oldı. Bu şirket faaliyetine dair vesiqalardan añlaşıla", – dep yaza TASS Rusiye haber agentligi.
Asret Transportation LLC şirketiniñ adresi olaraq Umerovlar qorantası Floridada Davie şeerinde Whitehall Drivede kiralağan evlerden biriniñ adresi qayd etildi, dep qoşa TASS.
"Qayd kâğıtına köre, Umerov 2025 senesi fevralniñ 5-nde Floridada qayd etilgende şirketniñ yekâne idarecisi olaraq qayd etildi. Bu vesiqada qayd etilgenine köre, yañı azalar eskileri bir ağızdan qoltutsa qabul etile bile ve teşkilât idarecisiniñ, yani o vaqıt Ukrayina Milliy telükesizlik ve mudafaa şurasınıñ kâtibi olğan Umerovnıñ ölümi, istifası ya da bankrotlığı vaziyetinde dağılmalı", – dep diger "tafsilâtlarını" bere daa bir Rusiye devlet agentligi RİA "Novosti".
"İzvestiya" gazetası da "tafsilâtlar" sepe: "Cedvel malümatına köre, Asret Transportation vesiqalarında Umerov aqqında malümat 2026 senesi aprelniñ 29-nda yıllıq esabatı berilgende peyda oldı. O, em registered agent olaraq qayd etildi – şirketniñ uquqiy vesiqalarını teslim almaqtan vekâletli olğan şahıs, em manager, yani idareci olaraq qayd etildi. O vaqıt şirket esas ve poçta adresini de Floridada Davie şeerindeki 1703 Whitehall Dr, Apt. 203 olaraq deñiştirdi. Aynı adres qayd levhasında da Umerovnıñ adresi olaraq qayd etildi".
"İzvestiya" "Milliy media gruppa" holdingine kire – Rusiye prezidenti Vladimir Putinniñ yaqın dostu Rusiye milliarderi Yuriy Kovalçuknıñ mediaaktivi.
Aynısını oquyıcılarına ve seyircilerine "Vesti" devlet neşiri, "Komsomolskaya pravda v Krımu" ve "Moskovskiy komsomolets v Krımu" bildirdi.
Umerovnen bağlı ilk yazı News Media Holding Rusiye mediaholdinginen bağlı Baza telegram kanalında peyda oldı.
Umerov, amma başqası
Umerov soyadı qırımtatarlar arasında çoq rastkele. Meselâ, İlmi Rustemoviç Umerov Bağçasaray rayon devlet memuriyetiniñ yolbaşçısı, Qırım Muhtar Cumhuriyeti Yuqarı Şurasınıñ reis muavini ve Qırımtatar Milliy Meclisiniñ reis muavini edi.
Umerov Nuzet Abibullayeviç (1931-2022) – şair, neşirci, terciman, jurnalist, qırımtatar bala edebiyatında zemaneviy yönelişniñ temelcisidir.
Bu malümat doğru degil. Birinciden, başqa Rustem Umerov aqqında aytıla – Ukrayina Tış istihbarat hızmetiniñ addaşıElvina Seitbullayeva
Rustem adı da çoq rastkele, şunıñ içün em addaş, em soydaş çoq ola. Rusiye kütleviy haber vastaları Ukrayina Tış istihbarat hızmetiniñ reberi yerine addaşı aqqında yazğanını ukrayinalı jurnalist Elvina Seitbullayeva bildirdi.
"Bu malümat doğru degil. Birinciden, başqa Rustem Umerov aqqında aytıla – Ukrayina Tış istihbarat hızmetiniñ addaşı, ekinciden, ruslar özara "sensatsiya" keliştirip olamadı. Rustem Umerovnıñ addaşı 31 yaşında. 2015 senesi Qırımnıñ Rusiye işğalinden soñ Kyivge köçkende tanıştıq. Rustem Kyivde oqudı, soñki bir qaç yıl ABDde yaşay. Floridada logistik şirket açtı. Keçenleri laf ettik. Şirket az çalışa, dep ayta. Başqa ştatqa köçe ve yañı işke kire eken. Ukrayina Tış istihbarat hızmetiniñ yolbaşçısını şahsen tanımay. Bir yerde körmedi, bir yaqınını tanımay. Adları ve soyadlarından ğayrı, başqa bir bağları yoq", – dep yazdı Seitbullayeva Facebook saifesinde.
Jurnalistniñ qayd etkenine köre, rusiyeliler özara bu "sensatsiyanı" keliştiremedi. RİA "Novosti" Umerov 2025 senesi fevralniñ 5-nde şirketni qayd etkeninden berli onı idare ete, dep bildire, "İzvestiya", TASS ve Baza Telegram kanalı ise aynı künü şunı yaza: bu malümat tek 2026 senesi aprelniñ 29-nda vesiqalarda peyda oldı.
Ukrayina Tış istihbarat hızmetiniñ yolbaşçısı Rustem Umerov Rusiye kütleviy haber vastalarınıñ haberini izaatlamadı.
Andrey Pokrovskiy – telükesizlik maqsadınen tahallüs qullanğan RFE/RL serbest hadimi
Bu maqale Felemenk Tış işler nazirliginiñ yardımınen Kütleviy haber institutı leyhası çerçivesinde azırlandı.