157-ge 157 yañı esir deñişüvi çerçiveyesinde Ukrayinağa deñiz piyade askeri, qırımtatarı Ruslan Kurtmallayev qaytarıldı. Bu aqta Qırımtatar Milliy Meclisiniñ azası, Qırımtatar Resurs Merkeziniñ yolbaşçısı Eskender Bariyev bildirdi, dep haber ete Ukrinform.
"Azat etilgen daa bir cenk esiri qırımtarı aqqında haber keldi – Ruslan Kurtmallayev", – dep yazdı Bariyev.
Zarema Bariyevanıñ Facebookta derc etken malümatına köre, Canköy rayonında doğğan 32 yaşında qırımtatarı eki yıldan ziyade bir kişilik kamerada yattı. Ruslan Kurtmallayev 2014 senesinden başlap Ukrayina ordusında hızmet etti. Üyken serjant ve Ukrayina Silâlı quvetleri 36-ncı ayrı deñiz piyade brigadası erkânındaki 501-inci ayrı deñiz piyade batalyonınıñ vzvod komandanı 2022 senesi aprelniñ 4-nde Mariupolde esir tüşti.
2022 senesi yazda ondan dört satırlıq qısqa bir mektüp keldi, onıñ sayesinde ailesi sağ olğanından haberdar oldı. 2023 senesi küzde koloniyadan bir kere telefon etti: er adam apayına sağ olğanını aytıp yetiştirdi.
Bundan evel yañı esir deñişüvi çerçivesinde Ukrayinağa Rusiyede mahküm etilgen Qırımlı deñiz piyade askeri Eskender Kudusov qaytarıldı, dep haber etildi.
Fevralniñ 5-nde Ukrayina Rusiye ile 71-inci esir deñişüvi çerçivesinde 157 arbiy ve vatandaş şahsını qaytarıp oldı, dep bildirdi Ukrayina Cenk esirlerine munasebet koordinatsion ştabı ve Ukrayina Yuqarı Radasınıñ insan aqları vekâletlisi Dmıtro Lubinets.
Prezident Volodımır Zelenskıynıñ qayd etkenine köre, Ukrayina vatandaşlarını esaretten qurtaruv işi devam ete.
"Bugünki deñişüv uzun bir aradan soñ kerçekleşti ve ömürge keçire bilmemiz pek müim", – dep yazdı o, içtimaiy ağlarda.
Bugün ABD prezidentiniñ mahsus vekili Steve Witkoff Birleşken Arap Emirlikleriniñ paytahtı Abu-Dabideki muzakerelerde ABD, Ukrayina ve Rusiye eyyetleri beş ayda ilk esir deñişüvi aqqında añlaştılar. O, X ağında eki taraftan 314 kişi azat etilecek, dep yazdı.
Fevralniñ 4-nde aqşam Ukrayina prezidenti Volodımır Zelenskıy Ukrayina ve Rusiye eñ yaqın vaqıtta cenk esirlerini deñişecek, dep bildirdi.