157-ge 157 yañı esir deñişüvi çerçivesinde Ukrayinağa Qırımlı deñiz piyade askeri Eskender Kudusov qaytarıldı. Onı Mariupolde esir alğan soñ Rusiye mahkemesi 29 buçuq yılğa azatlıqtan marum etken edi.
Bu aqta Qırımtatar Milliy Meclisiniñ reisi Refat Çubarov içtimaiy ağlardaki saifelerinde bildirdi.
"Quvançlı haber – deñişüv neticesinde azat etilgen 157 Ukrayinalı asker şimdi tuvğan toprağında. Çift quvanç da – azat etilgen arbiyler arasında deñiz piyade askeri usta-serjant Eskender Kudusov bar", – dep yazdı Çubarov.
41 yaşında Eskender Kudusov qorantasınen beraber sürgünlik yerlerinden Qırımğa qaytqan soñ 18 yaşından başlap Ukrayina ordusında hızmet etip başladı. Zaporijjâda askerlik yaptı. 2004 senesi Ukrayina barıştırıcı kontingenti erkânında Iraq cumhuriyetinde 10 ay hızmet etti, 2009 senesi ise Ukrayina barıştırıcı kontingenti erkânında Kosovo cumhuriyetinde hızmet etti. 2014 senesine qadar Kefede deñiz piyade askeri olaraq hızmet etti. 2014 senesi Rusiye tarafına keçmeyip, Mıkolayıvde deñiz piyadesinde hızmetine devam etti.
Büyük cenk başında Kudusov Donetsk vilâyetinde hızmet etip, Mariupol civarlarında vazifesini yaptı. Qırımtatar resurs merkeziniñ vekili Zarema Bariyeva yazğanına köre, 2022 senesi aprel ayında Eskender dört kişilik gruppa erkânında qurtulmaq ümütinen 26 km cayav keçti, amma aprelniñ 16-nda esir tüşti.
Bıltır oktâbr ayınıñ soñunda Eskender Kudusov Makeyevkadaki SİZOdan Rusiye kontrol etken Donetsk vilâyetiniñ Kirovske şeerindeki №8 tüzetüv koloniyasına ketirildi, dep haber etilgen edi.