Rostov-na-Donu Cenübiy okrugı arbiy mahkemesiniñ qadısı «qırımlı musulmanlar davasınıñ» beş mabüsini 15 yıldan 19 yılğa qadar azatlıqtan marum etti. Bu aqta «Qırım birdemligi» haber ete.
«Qırım birdemligi» ve «Grani.ru» internet-neşiriniñ mühbiri Remzi Bekirov ve aq qorçalayıcı Riza İzetov ilk 5 yılı apishanede, 1 yıl 6 ay sıñırlavı ile qalğanı sert rejimli tüzetüv koloniyasında keçecek 19 yılğa azatlıqtan marum etti.
Faal Raim Ayvazov 17 yılğa koloniyada qalmasına üküm etildi, ilk 5 yılı apishanede keçecek, 1 yıl ve 6 ay sıñırlanacaq. Faal Şaban Umerov 18 yılğa üküm etildi, ilk 5 yılı apishanede keçecek, 1 yıl ve 6 ay sıñırlanacaq. Faal Farhod Bazarov 15 yılğa üküm etildi, ilk 4 yıl ve 10 ay apishanede keçecek, 1 yılı sıñırlanacaq.
Umerov, Bekirov, İzetov ve Ayvazov Rusiye Ceza kodeksiniñ 205.5 maddesiniñ 1-inci qısmına istinaden («Terror teşkilâtınıñ faaliyetini teşkil etüv», ömür boyu azatlıqtan marum etüv) qabaatlandı. Bazarov – Rusiye Ceza kodeksiniñ 205.5 maddesiniñ 2-nci qısmına istinaden («Terror teşkilâtınıñ faaliyetinde iştirak etüv», 20 yılğa qadar azatlıqtan marum etüv). Qabaatlanğan dava mabüsleri Rusiye Ceza kodeksiniñ 30-ıncı maddesiniñ 1-inci qısmı ve 278-inci maddesine istinaden («Akimiyetni zorbalıqnen zapt etüv azırlığı», 10 yılğa qadar azatlıqtan marum etüv) qabaatlandı.
Dava malümatına köre, qabaatlanğanlarnıñ silâsı, patlayıcı maddeleri, silâ parçaları yoq edi, terror aktını yapmağa niyetleri yoq edi ve başqa terror areketlerine çağırmağan edi.
Qırımtatar faalleriniñ malümatına köre, bugünki künge qadar Qırımda buña oşağan qabaatlavlar boyunca 80-den çoq insan tahqiqat altında buluna ve mahküm etildi.
Martnıñ 10-na keçer gecesi mahküm etilgen «qırımlı musulmanlar davası» mabüsleriniñ soy-sopları Qırımdan Rusiyege üküm çıqarıluvına yiberilmedi. Rusiye quvetçileri Keriç köpründe mabüslerniñ advokatlarını ve jurnalistlerni blok etti. Rusiye uquq qoruyıcıları Keriç köpründe olğanlar aqqında açıq bildirmey.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. 2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
