Sentâbrniñ 7-nde Rostov-na-Donudaki Cenübiy bölgeniñ arbiy mahkemesi «Hizb ut-Tahrir davası»nıñ mabüsi Vadim Bektemirovnı dekabrgece tevqifli qaldırdı. Bunı «Qırım birdemligi» cemaat birleşmesiniñ mühbiri haber etti.
«Devlet qabaatlayıcısı Sergey Aydinov oturışnıñ başında Vadim Bektemirovnıñ tevqif müddetiniñ uzatılmasını istedi. Prokuror, mahkmelengen şaatlarğa tazyıq köstere, mahkemeden gizlene bile, mahkeme davasına mania ola bilecegi bildirip, maddeniñ ne qadar ciddiy olmasını qayd etti. Onıñ fikrince, mahkemelengenniñ sağlıq alı onıñ SİZO-da qalmasına imkân bere», – dep yazıla bildirmede.
Faallerniñ malümatına köre, mudafaa tarafı itiraz etken. Advokat Marlen Halikov, qabaatlav tarafı bütün delillerni endi taqdim etkenini diqqat çekti ve oña Dörtünci Jeneva şartnamesiniñ maddelerini qullanmağa rica etti.
Amma qadılar kollegiyası mesleatlaşuv odasında bir saat keçirgen soñ Vadim Bektemirovnıñ tevqif müddetini dekabrniñ 16-nace uzattı.
Hatırlatamız, 2020 senesi iyülniñ 7-nde Rusiye quvetçileri yedi qırımtatarınıñ evini tintti.
Rusiye FSBsiniñ malümatına köre, mahsus hızmetniñ hadimleri Qırımda «Hizb ut-Tahrirni» teşkil etkeninden ve iştirak etkeninden şübheli sayılğan yedi insannı tuttı. FSB, bu insanlar «Qırım sakinleri arasında terror mefküresini yayıp, qırımlı musulmanlarnı öz saflarına celp etti», dep bildire. Rusiye mahsus hızmetiniñ matbuat hızmeti bildirgenine köre, «(teşkilât) azalarınıñ yaşağan yerlerinde Rusiyede yasaqlanğan «Hizb ut-Tahrir al-İslami» propaganda malümatları, terror faaliyetinde qullanılğan bağ vastaları, elektron malümat taşıyıcıları tapılıp alındı».
Ukraina prezidentiniñ Qırım Muhtar Cumhuriyetindeki temsilciligi Rusiye quvetçileriniñ areketlerini takbih etti, Milliy politsiyanıñ Qırım Muhtar Cumhuriyeti ve Aqyar Baş idaresi ise Ukraina Ceza kodeksiniñ 162-nci maddesiniñ 2-nci qısmına istinaden (mesken tiyilmemezligini bozuv) cinaiy tahqiqat başlattı.
«Memorial» aq qorçalayıcı merkezi qırımlı Vadim Bektemirovnı siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
