Krasnodarnıñ dörtünci temyiz mahkemesi patlayıcı maddelerni yapqanınen qabaatlanğan Qırım sakini Yunus Maşaripovnıñ cinayet davasını ğayrıdan baqılmaq içün qaytarğan.
Bunı Qırım.Aqiqatqa «Qırım birdemligi» cemaat birleşmesi advokat Aleksey Ladinge atfı etip bildirdi.
Advokatnıñ añlatqanına köre, mudafaa taarfı temyiz şikâyetini, prokuratura ise temyiz teklifini bergen, olar martnıñ 1-nde baqılğan.
«Maşaripov cinayet etmegeni aqqında arizadan ğayrı advokat aqlı yerinde olğanı aqqında sual kerekli kibi ögrenilmegeni, ekspertler çağırılmağani, eki hulâsa ise bir-birine zıt kelgeninde israr etti. Prokuratura ise, cinayet etmegenini tanığan istinaf tarifniñ lâğu etilmyesini istedi. Mahkemeni onı lâğu etti ve bam-başqa terkipte Qırımnnı Yuqarı mahkemesine yolladı», – aytıp berdi Ladin.
Mudafaa tarafı, bu temyiz talabını temyiz etecegini bildirdi. Eger de lâğu etilmese ve dava Qırım mahkemesinde baqılmağa devam etilse «cinayet faaliyeti olmağanı içün cinayet davasınıñ qapatılmasını» talap etecek.
Advokat Aleksey Ladinniñ bildirgenine köre, Rusiye kontrolindeki Qırım prokuraturası patlayıcı madde azırlağanında qabaatlanğan qırımtatarı Yunus Maşaripovnıñ davası boyunca istinaf qararını lâğu etilmesi içün temyiz etti.
Maşaripov 2017 senesi sentâbr ayında tutulıp apiske alındı. Onıñ aytqanına köre, Rusiye FSBsiniñ hadimleri onı kötekledi ve aqımnen eziyetlediler, şunıñ içün özüne iftira atmağa mecbur edi. O, 2014 senesinden berli «bala ve pensiyalılarnıñ aqları bozulğanını teşkilâtlarğa bildirip», aq qorçalayıcı faaliyetinen oğraşqan edi.
Rusiye kontrolindeki Yalta şeer mahkemesi Maşaripovnı patlayıcı maddelerni yapqanında ve saqlağanında qabaatlap, 4 yıl koloniyada qalmasına ve 110 000 para cezası (tahminen 41 biñ ğrıvnâ) tölemesine üküm etti.
Qırımnıñ Rusiye Yuqarı mahkemesiniñ Temyiz instantsiyası Maşaripovnıñ şikâyet arizasını qabul etti.
«Memorial» aq qorçalayıcı merkezi Yunus Maşaripovnı siyasiy mabüs olaraq tanıdı.
