Advokat Aleksey Ladinniñ bildirgenine köre, Rusiye kontrolindeki Qırım prokuraturası patlayıcı madde azırlağanında qabaatlanğan qırımtatarı Yunus Maşaripovnıñ davası boyunca istinaf qararını lâğu etilmesi içün temyiz etti.
«Qırım prokuraturası istinaf qararı lâğu etilsin dep temyiz etti. İmaye ise Maşaripovnı aqlasınlar dep israr ete, ve bu dava FSB tarafından uydurıldı», – dep bildirdi Ladin.
Onıñ malümatına köre, martnıñ 1-nde Maşaripovğa qarşı cinaiy dava temyiz mahkemesinde baqılacaq.
Qırım prokuraturası bu davanı açıq şekilde izaatlamay.
Maşaripov 2017 senesi sentâbr ayında tutulıp apiske alındı. Onıñ aytqanına köre, Rusiye FSBsiniñ hadimleri onı kötekledi ve aqımnen eziyetlediler, şunıñ içün özüne iftira atmağa mecbur edi. O, 2014 senesinden berli «bala ve pensiyalılarnıñ aqları bozulğanını teşkilâtlarğa bildirip», aq qorçalayıcı faaliyetinen oğraşqan edi.
Rusiye kontrolindeki Yalta şeer mahkemesi Maşaripovnı patlayıcı maddelerni yapqanında ve saqlağanında qabaatlap, 4 yıl koloniyada qalmasına ve 110 000 para cezası (tahminen 41 biñ ğrıvnâ) tölemesine üküm etti.
Qırımnıñ Rusiye Yuqarı mahkemesiniñ Temyiz instantsiyası Maşaripovnıñ şikâyet arizasını qabul etti.
«Memorial» aq qorçalayıcı merkezi Yunus Maşaripovnı siyasiy mabüs olaraq tanıdı.
