Link açıqlığı

Saatnıñ esas haberi

Rusiyedeki mahkeme Aqmescitteki «Hizb ut-Tahrir davası» mabüslerini apiste qaldıruv qararına qarşı istinaf şikâyetini red etti – advokatlar


Cemil Gafarov
Cemil Gafarov

Soçiniñ Üçünci istinaf mahkemesi yanvarniñ 14-nde Aqmescitteki ekinci «Hizb ut-Tahrir davasınıñ» mabüsleri Cemil Gafarov, Remzi Bekirov, Enver Ametov, Alim Karimov ve Tofik Abdulgaziyevniñ apiste tutuv müddetlerini uzatuv qararına qarşı advokatlarnıñ şikâyetini red etti. Bu aqta «Qırım birdemligi» cemaat birleşmesi Qırım.Aqiqatqa bildirdi.

«Mahkeme konveyer kibi çalıştı, esnasqa yarım saat ayırıp, fikrini aytmağa bermedi. Beklegenimiz kibi», – dep ayttı advokat Edem Semedlâyev.

İmaye, mahkeme qararı tahminlerge esaslana, tahqiqat organları qırımtatarlarnı aman-aman eki afta devamında «insanğa uyğun olmağan şaraitlerde» tuta, dep qayd etti. Advokatlar bergen muracaatlarında siyasiy mabüslerni tahqiqat izolâtorında tutıp, Dördünci Jeneva şartnamesi ve Halqara uquq normaları bozula, dep qayd etti.

Qabaatlanğanlar sözge çıqıp, terrorist olmağanlarını ve terror cinayetlerini yapmağanlarını ayttı. Olarnıñ bildirgenine köre, Rusiyeniñ olarnı izolâtorda tutmaq aqqı yoq ve «körgen bir şeyleri bar – olarğa ve qorantalarına, halqqa qarşı devlet terrorı yapıla».

«Bugün Avropa insan aqları mahkemesi Ukrainanıñ Rusiye Federatsiyasına qarşı devletlerara davasını qabul etti, meselelerniñ bir qısmı anda da baqılacaq», – dep qoştı advokat Emil Kurbedinov.

Advokat Semedlâyev daa bir kere qayd etti ki, Cemil Gafarovnıñ sağlıq vaziyeti – esli-başlı ekinci derece saqatı – kün-künden fenalaşa ve onı «yavaş-yavaş öldüreler».

Rostov-na-Donu Cenübiy okrugınıñ arbiy mahkemesi Aqmescitteki «Hizb ut-Tahrir davasınıñ» mabüsleri Cemil Gafarov, Servet Gaziyev, Alim Karimov, Seyran Murtaza ve Erfan Osmanovnıñ apiste qaluv müddetini yarım yılğa uzattı. Olar Aqmescit SİZOsından Rostovğa avuştırılacaq.

2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Tutulğanlar arasında qırımtatar cemaat jurnalistleri Rustem Şeyhaliyev, Osman Arifmemetov ve Remzi Bekirov bar ediler.

OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.

Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG