Rusiyedeki Cenübiy okrugınıñ arbiy mahkemesi iyünniñ 28-nde Aluştadaki «Hizb ut-Tahrir davasınıñ» mabüsleri Ruslan Nagayev, Eldar Kantimirov, Lenur Halilov ve Ruslan Mesutovnıñ sıñırlav tedbirini 3 ayğa uzattı. Bu aqta «Qırım birdemligi» cemaat birleşmesi advokat Ayder Azamatovnıñ malümatına esaslanıp bildire.
Mabüsler oktâbrniñ 14-ne qadar SİZOda apiste qalacaq. Prokuror eski sebepler ve qabaatlanğan areketlerniñ ağırlığına esaslanıp, sıñırlav tedbiriniñ uzatılması aqqında rica etti. İmaye, müvekkilleriniñ qoranta alına ve SİZOdan kelgen müsbet hasiyetnamelerge esaslanıp, azatlıqtan marum etüvnen bağlı olmağan sıñırlav tedbirini belgilemege rica etti.
İmaye munaqaşaları kene olmadı. Berilgen malümatqa köre, bugün Ruslan Nagayev Rostov-na-Donu SİZO-5-ne ketirilmedi, andan hastanen alâqada olğanına dair vesiqa berildi.
«Qayd etmeli ki, keçken sefer Lenur Halilov ketirilmedi. O, bugün mahkemege kelip olamağanını inkâr etip, iyünniñ 24-nde oturışuvğa ketirilmegende alı normal olğanını ayttı. Reis qadı dördüniñ sağlıq vaziyetinen bağlı SİZOğa muracaat etecek, dep vade etti», – dep bildirdi Ayder Azamatov.
Advokatnıñ aytqanına köre, mahkeme prokurornıñ muracaatınen bağlı mahkeme tahqiqatını yañarttı. Qabaatlav ve imayeniñ qoşma delillerni köstermege imkân olacaq, bundan soñ prokuror kene munaqaşada sözge çıqacaq. Esnas iyülniñ 29-na qadar qaldırıldı.
Rusiye quvetçileri qırımlılarnı 2019 senesi iyünniñ 10-nda keçirgen tintüvlerden soñ tuttı. Rusiye FSBsi, tahqiqat tedbirleri 205.5 maddesine istinaden (terror teşkilâtınıñ faaliyetini teşkil etüv ya da iştirak etüv) çerçivesinde keçirile ve «Hizb ut-Tahrir» teşkilâtınen bağlı. Ruslan Nagayev ve Eldar Kantimirov Aluştada, Ruslan Mesutov Büyük Lambatta (Malıy Mayak), «Aluşta» yerli din cemiyetiniñ yolbaşçısı Lenur Halilov Körbek (İzobilnoye) köyünde tutuldı.
Dava mabüsleri al-azırda Rostov-na-Donu şeeriniñ №1 tahqiqat izolâtorında buluna, cinaiy dava ise mahkeme tahqiqatında qala.
«Memorial» aq qorçalayıcı merkezi Aluştadaki «Hizb ut-Tahrir davasınıñ» dört mabüsini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
