Link açıqlığı

Saatnıñ esas haberi

«Hizb ut-Tahrir davası»: «Memorial» daa dört qırımtatarını siyasiy mabüs dep tanıdı


Aluştadaki «Hizb ut-Tahrir davasınıñ» mabüslerinden biri
Aluştadaki «Hizb ut-Tahrir davasınıñ» mabüslerinden biri

«Memorial» aq qorçalayıcı merkezi Aluştadaki «Hizb ut-Tahrir davasınıñ» dört mabüsini siyasiy mabüs dep tanıdı. Bu aqta merkezniñ saytında haber etile.

«Siyasiy mabüs» ıstılası boyunca halqara qılavuzğa köre, «Memorial» qırımtatarları Eldar Kantimirov, Ruslan Mesutov, Ruslan Nagayev ve Lenur Halilovnı siyasiy mabüs dep saya. Musulmanlar vicdan, din kütme ve birlik aqqını zorbalıqsız yerine ketirgeni içün azatlıqtan marum etildi. Olarnıñ acele azat etilmesini talap etemiz», – dep aytıla haberde

Bu sene iyün ayında «Memorial» Qırımdaki «Hizb ut-Tahrir davalarınıñ» mabüsleri Ayder Capparov, Riza Ömerov, Enver Ömerov, Enver Seytosmanov, Akramjon Abdullayev ve Nematjon İsroilovnı siyasiy mabüs dep tanıdı.

Rusiye quvetçileri qırımlılarnı 2019 senesi iyünniñ 10-nda keçirgen tintüvlerden soñ tuttı. Rusiye FSBsi, tahqiqat tedbirleri 205.5 maddesine istinaden (terror teşkilâtınıñ faaliyetini teşkil etüv ya da iştirak etüv) çerçivesinde keçirile ve «Hizb ut-Tahrir» teşkilâtınen bağlı.

«Qırım birdemligi» birleşmesi bildirgenine köre, Ruslan Nagayev ve Eldar Kantimirov Aluştada, Ruslan Mesutov Büyük Lambatta (Malıy Mayak), «Aluşta» yerli din cemiyetiniñ yolbaşçısı Lenur Halilov Körbek (İzobilnoye) köyünde tutuldı.

Dava mabüsleri al-azırda Rostov-na-Donu şeeriniñ №1 tahqiqat izolâtorında buluna, cinaiy dava ise mahkeme tahqiqatında qala.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG