Rusiye Federatsiyasınıñ Adliye nazirligi «istenilmegenler» cedveline daa üç teşkilâtnı qoştı, dep aytıla müessise saytında. Cedvelde Ukrayınada qayd olğan «Qırımtatar Resurs Merkezi» dep bar.
Cedvelge Yaponiyada qayd olğan «Şimaliy topraqlarnı qaytaruv birligi» (Yaponiyada şimaliy topraq olaraq Ekinci cian cenkiniñ soñunda Sovetler Birligi tarafından işğal etilgen Küril dağ sıralarınıñ cenübiy qısmınıñ adalarını adlandıralar); İsviçrede qayd olğan IndustriALL sanayı işçileri zenaat birlikleriniñ halqara birleşmesi de kirsetildi.
Qırımtatar Resurs Merkezi Qırımda insan aqları bozuluvınıñ monitoringini keçire ve yarımadanıñ işğalden azat etilüvinen bağlı kampaniyalar alıp bara.
Rusiyede faaliyeti istenilmegen çetel ve halqara teşkilâtlar cedvelinde 137 teşkilât bar.
Rusiyede, Rusiye Federatsiyası Baş prokuraturasınıñ fikirince, «devlet ve anayasa qurumınıñ esasları içün telükeli» olğan ükümetten tış er angi teşkilât «istenilmegen» ola bile. «İstenilmegen» teşkilâtlarnıñ Rusiyede faaliyet köstermesi yasaqlana. Bundan ğayrı, Rusiyede malümat tarqatmaları da yasaq.
«İstenilmegen» teşkilâtnıñ faaliyetinde iştirak etüv içün memuriy mesüliyet (Rusiye Federatsiyası Memuriy uquq bozuvları kodeksiniñ 20.33 maddesi – 15 biñ rublege qadar para cezası), soñra ise cinaiy mesüliyet (Rusiye Federatsiyası Ceza kodesiniñ 284.1 maddesiniñ 1-inci qısmı, eñ büyük cezası – 4 yılğa qadar azatlıqtan marum etüv) bar. 284.1 maddesi «istenilmegen» teşkilâtnıñ faaliyetini maliye etüv ya da teşkil etüv içün de qullanalar, cezası beş yıldan altı yılğa qadar apis cezası ola bile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
