Rusiye mahkemesi tarafından 13 yılğa azatlıqtan marum etilgen "Qırım musulmanları davası"nıñ figurantı Ernest İbragimov Rusiyeniñ Orenburg vilâyetindeki 5-nci tüzetüv koloniyasına etap etildi. Bundan evel ondan bir ay devamında iç haber yoq edi. Bu aqta "Qırım birdemligi" siyasiy mabüsniñ ömür arqadaşı Venera İbragimovağa atıf etip bildire.
Berilgen malümatqa köre, İbragimovnı noyabrniñ 8-nde Rusiyeniñ Saratov vilâyetindeki Balaşov apishanesinden çıqardılar. Bir ay soñ, dekabrniñ 6-nda, siyasiy mabüs qorantasına telefon etip, onı koloniyağa ketirgenlerini bildirdi.
Al-azırda qırımlı karantinde tutula. İbragimov sağlığından şikâyet etmey.
"O, etap vaqtında azdı, lâkin meni keder etmemek içün ne qadar qaç kilo olğanını aytmadı", — dep tarif etti İbragimovnıñ qadını.
2021 senesi fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.
«Memorial» aq qorçalayıcı merkezi «qırımlı musulmanlar davasınıñ» mabüslerini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
