Rusiyede Lefortovo SİZOsında tutulğan qırımlı Leniye Umerovağa qarşı dava malümatları gizlendi. Bu aqta tutulğannıñ ağası Aziz tarif etti, dep haber ete Ukrinform.
«Dava tafsilâtlarını bizge aytmaylar, bütün malümat gizli. Advokatnı malümat tarqatmaycaq dep kâğıt imzalamağa mecbur ettiler. Bağlanıp olamaymız, tek advokat vastasınen bağ tutamız. Bütün mesaclarnı mahsus hızmetler teşkere, Leniyeniñ yazğanları da teşkerile. Alı bir qarar, lâkin aman-aman yarım yıldan berli nezaret altında tutulğanını köz ögüne almaq kerek. Maneviy alı yahşı dep aytmaq mümkün degildir», – dep qayd etti o.
«Qırım aq qorçalayıcı gruppasınıñ» idare reisi Olga Skrıpnik qayd etkenine köre, Umerovanıñ davasında rusiyeliler ciniay tahqiqat başlatmaq içün memuriy apis cezalarını qullandı.
«Vaqıt sozmaq içün bir alet. Başta Leniyeni üç ay devamında çetel vatandaşları merkezinde tutqanlar, dava uydurmaq içün bu vaqıt yetmedi. Şunıñ içün eñ az dört «memuriy dava» açıldı. Tüşüniñiz, SİZOda insan riayet etmegeninde qabaatlana, saçma», – dedi o.
Skripnik qayd etkenine köre, qırımlı memuriy apis altında tutulğanda FSB hadimleri sebepsiz kele edi.
«Vesiqa, cep telefonı, bank kartlarını alğanlar – soñra ise hırsızlap, Moskvağa alıp ketkenler. Keçenleri Leniyeni maskalı insanlar alıp ketirgeni qayd etilgen videonı paylaşqanlar. Ebet, bu video FSB isteginen tarqatıldı, casus ve diversant sımalarını şekillendirecek olalar», – dep qayd etti o.
Bıltır dekabr ayında 25 yaşında Leniye Umerova Kyivden Qırımğa ketmege mecbur edi, çünki babasınıñ qanseri bar. Rusiye sıñırcıları Leniye Umerovanı Gürcistan-Rusiye sıñırından keçken soñ rejim alanı qaidelerini bozğanı sebebinden tuttı.
Ağası Aziz Umerov Qırım.Aqiqatqa izaat berip, qardaşı üç ay devamında çetele vatandaşları içün merkezde tutuldı, der tarif etti. Amma martnıñ 13-nde mahkeme qararınen onı andan azat etip aldılar.
«Advokatlarğa, tuvğanlarına telefon etmege imkân bermediler – gece yarısı onı o merkezden çıqardılar. Bundan soñ vatandaş urbada erkeklernen maşina keldi, başına çuval taqqanlar, belli olmağan yerge alıp ketkenler ve soqaqqa atqanlar», – dep tarif etti Umerov.
Aman-aman birden Leniyeni vesiqaları olmağanı içün polis patruli tuttı, dep tarif etti ağası. Rusiye mahkemesi ise onı 15 künge apiske aldı. Soñra qızğa qarşı daa eki protokol tizildi – ana-babasına telefon etmek içün qullanğan telefonını vaqtında bermegeni ve konvoy maşinasından çıqmağa razı olmağanı içün. Eki sefer de mahkeme Ukrayina vatandaşınıñ apis müddetini 15 künge uzattırdı.
Qırım Muhtar Cumhuriyeti ve Aqyar prokuraturası Rusiye tarafından qırımtatarı Leniye Umerovanıñ tutulğanını tahqiq etip olamay, çünki bu cinayet Qırımda olmağan.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
