Aprelniñ 23-nde olğan malümatqa köre, Rusiyede 62 773 koronavirus hastası qayd etildi. Qırğınlıq devamında 555 insan virus qurbanı oldı, 4891 kişi tüzeldi, dep haber ete «Nastoyaşçeye Vremâ» koronavirus ile küreş operativ ştabına esaslanıp.
Eñ çoq hasta kene Moskvada qayd etile, soñki künde paytahtta daa 1959 kişi hastalandı.
Moskva şeer yolbaşçısınıñ içtimaiy inkişaf meseleleri muavini Anastasiya Rakovanıñ bildirgenine köre, Moskvada koronavirustan tedaviylengen daa 181 kişi tüzeldi.
Soñki künde Moskvada pnevmoniyası tasdıqlanğan ve koronavirus testi müsbet çıqqan 27 insan vefat etti, dep bildire operativ ştab. Ölgenler arasında – 38 yaşından 90 yaşına qadar insanlar.
Çoqusınıñ hronik hastalığı bar edi: gipertoniya, hronik bronhit, şeker hastalığı, hronik limfoleykoz. 38 yaşında hastanıñ hronik bronhiti bar edi.
Daa evel Rusiyede koronavirus tarqaluvı yavaşladı, dep haber etilgen edi. Soñki künde Rusiyede 4774 koronavirus hastası qayd etildi. Resmiy malümatqa köre, yañı hastalarnıñ sayısı eki künden berli artmay.
Dünyada, aprelniñ 23-nde olğan malümatqa köre, koronavirus neticesinde vefat etkenlerniñ sayısı 177 200 kişiden 183 336 kişige qadar arttı, dep bildirdi Johns Hopkins Universiteti.
Umumen dünyada, universitet malümatına köre, 2 627 630 koronavirus hastası bar, bir künde 65 715 hasta qayd etildi.
100 biñden çoq hasta ABDde qayd etildi – 841 556 (46 688 vefat etti), İspaniyada – 208 389 (21 717), İtaliyada – 187 327 (25 085), Frenkistanda – 157 135 (21 340), Almaniyada – 150 648 (5 315 ), Büyük Britaniyada – 134 638 (18 151).
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
