Rusiyeniñ Cenübiy bölgesiniñ arbiy mahkemesiniñ qadısı Oleg Volkov birden üç Qırım advokatına – Emil Kürbedinov, Edem Semedlâyev ve Nazim Şeyhmambetovğa hususiy mahkeme qararını çıqardı. Bunı Qırım.Aqiqatqa «Qırım birdemligi» cemaat birleşmesi haber etti.
Fallerniñ bilirgenine köre, bu advokatlar ekinci Aqmescit «Hizb ut-Tahrir davası» mabüslerini imaye ete ekenler. Qadı bu qararnı, 2021 senesi mayısnıñ 11 ve 12 Raim Ayvazov, Remzi Bekirov, Riza İzetov, Şaban Ümerov ve Farhod Bazarovnıñ davası boyunca olıp keçken mahkeme oturışına advokatlar kelmegeni içün çıqarğan.
Advokatlar kelgenlerininiñ sebebin böyle añlatqanlar: mayısnıñ 4-den 8-nece olar hızmet yolcuığında ediler ve qaytqan soñ Rospotrebnadzor tet yapılğance samoizolâtsiya rejimine riayet etmelerini istegen, test yapqan laboratoriyalar ise tek mayısnıñ 11-nden yaalışıp başlağan.
Advokatlar kelgenleri delilli olğanını tasdıqlağan vesiqalarnı bergenler, amma qadı olarnı diqqatqa almağan.
«Bu mudafaağa qarşı basqıdır ve o bizim faal mevamımız ile bağlı. Sebeplerni añlattıq ve isbatladıq. Başqa türlü bunı anlatmaq mümkün», – degil dedi Şeyhmambetov.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Tutulğanlar arasında qırımtatar cemaat jurnalistleri Rustem Şeyhaliyev, Osman Arifmemetov ve Remzi Bekirov bar ediler.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
