Rusiyeniñ 83 regionında bir künde 5966 yañı koronavirus hastası qayd etildi. Bu aqta operativ ştab bildire. 66 insan vefat etti, 41-i Moskvada, 682 kişi tüzelip yahşı oldı, dep haber ete Azatlıq Radiosı.
Aprelniñ 25-ne qadar Rusiyeniñ 85 regionında 74 588 koronavirus hastası qayd etildi. Qırğınlıq başlağanından berli 681 vefat qayd etildi, 6250 kişi tüzeldi.
Soñki künde Moskvada vefat etkenler arasında – 34 yaşından 92 yaşına qadar insanlar. Berilgen malümatqa köre hastalarnıñ hronik hastalıqları bar edi: şeker, gipertoniya, hronik piyelonefrit, holetsistit, virus gepatiti, leykoz.
Eñ yaşı, 34 yaşındaki erkekniñ hastahanege alğanda pnevmoniya diagnozı qoyuldı. Onıñ şeker hastalığı da bar edi.
Moskvada koronavirustan vefat etkenlerniñ sayısı 336 oldı, 3047 insan tüzeldi, 312-si – soñki künde.
Hatırlatamız, aprelniñ 25-ne qadar Ukrainada 8125 COVID-19 koronavirus hastası qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
