Ukrainada aprelniñ 25-ne qadar 8125 COVID-19 koronavirus hastası qayd etildi, dep haber ete Ukraina Sağlıq nazirliginiñ Cemaat sağlığı merkezi.
Aprelniñ 24-nde 478 yañı hasta aqqında haber etildi, dep bildire Azatlıq Radiosı.
Eñ çoq hasta Çernivtsi vilâyetinde (1308), Kyivde (1159), İvano-Frankivsk vilâyetinde (700) qayd etildi.
«5498 kişi hastahanede tedaviylene, 433-ü bala ve 1301-i tibbiyet hadimidir. 2627 insan hastahanege alındı, 112-si bala ve 273-ü tibbiyet hadimi ola. 104 insan aqcigerlerni suniy avalandıruv cihazına bağlandı, aralarında bir bala bar», – dep aytıla haberde.
Hastalıq ağırlaşuvları neticesinde 201 kişi vefat etti, 105-i erkek ve 96-sı qadın ola. Ölgenlerniñ çoqusı (86%) 50 yaşından büyük insanlardır.
782 kişi tüzeldi, 145-i tibbiyet hadimi ola, tekrar yapılğan tedqiqler virusnı qayd etmedi.
Qırğınlıq sebebinden Ukrainada mayısnıñ 11-ne qadar karantin ilân etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
