Rusiyeniñ Başkortostan koloniyasında bulunğan Aqmescitteki «Hizb ut-Tahrir davasınıñ» mabüsi Emil Cemadenov 70 künden berli ceza izolâtorında buluna. Bu aqta Ukraina ombudsmeni Lüdmila Denisova bildirdi.
«Rusiyede ve vaqtınca işğal etilgen Qırımda bulunğan qırımtatarlardan koloniyalarnıñ ceza izolâtorlarına sebepsiz qapatılğanına ve tutuv şaraitleri uyğun olmağanına dair çoq haber alamız», – dep yazdı Denisova.
Denisova, Rusiye ombudsmeni Tatyana Moskalkovağa ve halqara toplulıqqa muracaat etip, mabüske yardım etmesini talap etti.
Cemadenovnıñ ömür arqadaşı Liana Belâlovanıñ aytqanına köre, Emil qorantasına telefon etip, ceza izolâtorında tutulğanını haber etti.
Aqmescitteki «Hizb ut-Tahrir davası» beş mabüsiniñ ömür arqadaşları aqaylarına Rusiye apishanesinde basqı yapılğanı ve uzun müddet devamında ceza izolâtorında tutqanları içün Rusiye insan aqları vekâletlisi Tatyana Moskalkovağa muracaat etken edi.
Rusiye ombudsmeni bu muracaatqa cevap bermedi.
Rusiye Yuqarı mahkemesi 2019 senesi dekabrniñ 24-nde istinaf şikâyetini baqıp, «Hizb ut-Tahrir davası» mabüsleriniñ (Aqmescitteki birinci gruppa) ükmüni deñiştirdi. Qırımlılarnıñ apis cezaları 6 ayğa eksildi.
Böylece, Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov 11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
2019 senesi iyün ayında Rostov-na-Donunıñ Cenübiy okrugınıñ arbiy mahkemesi bu dava mabüsleri Teymur Abdullayevni 17 yılğa, Uzeir Abdullayevni 13 yılğa, Rustem İsmailovnı 14 yılğa, Ayder Saledinov ve Emil Cemadenovnı 12 yılğa üküm etti.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
