Rusiye Tış işler nazirligi Ukraina prezidenti Volodımır Zelenskıynıñ Qırım hatırlavlarına ve yarımada «bir vaqıt rus toprağı olmaycaq» sözlerine cevap berdi. Rusiye nazirligi Qırımnı ziyaret etmesi mümkün ola bilecek şartlarnı Qırımdaki temsilciligi vastasınen bildirdi.
«Sovetlerniñ Qırımı Zelenskıyde silinmez tesir qaldırğanına quvanamız. Belki, bir kün oña rapannıñ dadını hatırlatmaq içün onı Rusiye Qırımında qabul etmege azır olurmız, amma başta «Qırım ve Donbas» halqları ögünde yapqan cinayetleri içün tövbe etmeli», – dep aytıla Rusiye Tış işler nazirligi temsilciliginiñ tvitter haberinde.
Volodımır Zelenskıy ya da Ukraina prezidentiniñ ofisi buña şimdilik cevar bermedi.
Avgustnıñ 2-nde Ukraina prezidenti Volodımır Zelenskıy «Dom»telekanalına bergen interyüsında Qırımnı işğalden qurtaruv «tek vaqıt meselesi» ola, dep bildirdi.
«Qırım bir vaqıt rus toprağı olmaycaq. (Qırımtatarlarınıñ – QA) Tatarlarnıñ aqlını silip, «mında yoq ediñiz», «sürgünlik uydurıldı», dep aytmaq mümkün degil. Bu imkânsız. Tarihnı yañıdan yazsañız da, şeerlerniñ adlarını deñiştirseñiz. Episi evlerine qaytacaq. Bu tek vaqıt meselesi», – dedi Zelenskıy.
Ukraina prezidentiniñ aytqanlarına Rusiye kontrolindeki Qırım yolbaşçısı Sergey Aksenov da cevap berdi. Rusiye Devlet Dumasınıñ spikeri Vâçeslav Volodin de Ukraina prezidenti Volodımır Zelenskıynıñ Qırım aqqında aytqanlarına cevap berdi.
Kreml, Rusiye 2014 senesi işğal etken Qırımnıñ topraq mensüpligi meselesi muzakere etilmeycek, dep bildirgen edi. 2014 senesi AB ve ABD Qırım işğali ve Rusiyeden destek alğan «DNR» ve «LNR» tarafından bir qısmı işğal etilgen Donbastaki vaziyet sebebinden Rusiyege qarşı sanktsiyalar kirsetti.
Ukraina Tış işler naziri Dmıtro Kuleba Kremlniñ Qırımnıñ topraq aitligi meselesi qapalı olğanına dair beyanatını «yañlış» dep adlandırdı. Onıñ aytqanına köre, yarımada Ukraina kontroline qaytqanına qadar Qırım meselesi halqara kün tertibinde qalacaq. «Qırım platforması» buña yardım etecek, dep qayd etti Kuleba.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
