Rusiye Yuqarı mahkemesi apiste elâk olğan qırımtatar faali Cemil Gafarovnıñ imayesiniñ temyiz talabını qanaatlendirdi. Bu aqta onıñ advokatı Rifat Yahin bildirdi.
Onıñ aytqanına köre, 13 yıllıq sert rejimli koloniya ükmü ölümden soñ lâğu etildi. Qabaatlanğannıñ ölümi sebebinden cinaiy taqip toqtatıldı.
"İstinaf mahkemesi ve sisteması endi olmağan insannı cezalamaq istese de, 1,5 yıl devamında apishaneniñ tibbiy komissiyalarında eki kere saqatnıñ telükeli hastalığını ve ayatına telükeli olğanını tanımayıp, er seferinde onı apiste tuta bilecegine dair resmiy qarar çıqarğan sistemağa, yazıq ki, olar içün, bizler içün ise, yahşı ki, cezalamaq imkân olmaycaq, çünki o, başqa küçlernen azat etildi .. .. ve bu sebepten yalıñız bir şeyni rica etem — elâk olğan insannıñ ruhunı raat qaldırıñız", — dep ayttı advokat mahkeme toplaşuvı vaqtında.
2023 senesi fevral ayında Qırımlı aq qorçalayıcılar Rusiye tarafından "qırımlı musulmanlar davasına" istinaden mahküm etilgen ve siyasiy mabüs dep tanılğan qırımlı Cemil Gafarovnıñ Rusiye SİZOsında vefat etkeni aqqında bildirdi.
Aqmescit rayonındaki Mamaq köyüniñ sakini Cemil Gafarov dört yıldan berli Rusiye apsinde yattı. Bu yıl yanvarniñ başında Rostov-na-Donu Cenübiy okrugınıñ arbiy mahkemesi "25-niñ davası" olaraq belli cinaiy dava boyunca 13 yılğa azatlıqtan marum etildi. Dava çerçivesinde Rusiye uquq qoruyıcıları 25 qırımlı musulmannı terrorizmde qabaatladı, çoqusı apiske alınmazdan evel faal vatandaş edi, "Qırım birdemligi" cemaat birleşmesi çerçivesinde faal ve vatandaş jurnalistleri olaraq belli edi.
Cemil Gafarovnıñ sağlıq problemleri apiske alınmazdan evel de bar edi. Üçünci derece saqatı edi. Ömür arqadaşı Raziye Gafarovanıñ aytqanına köre, qırımlınıñ dördünci derece büyrek yetersizligi, gipertoniya ve yürek hastalığı bar. O, miokard infarktını keçirdi ve SİZO şaraitlerinde olmağan büyrek dializine ihtiyacı bar edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
