Rusiye Yuqarı mahkemesi "Qırım musulmanları davasınıñ" mabüsi, arap tili filologı Ernest İbragimovnıñ ükmüni deñiştirmedi. Bu aqta advokat Edem Semedlâyevge atfı etip, "Qırım birdemligi" haber ete.
Mahkeme iç bir delilimizni qabul etmedi. "Temyiz qararını elde etkende, sebeplerni bilecekmiz", — dep ayttı o.
İbragimov birinci instantsiya mahkemesinde qabaatını inkâr etip, qırımtatarlarnı siyasiy ve diniy sebeplerden taqip etkenlerini bildirdi.
"İslâm meni çağıruvğa, aqiqat sözüni aytmağa terbiye etti ve adaletsizlik ve zulum ögünde susmağa yasaq etti. Qalbim köksümde urğanına ve ruhum bedenimden çıqqanına qadar, kerçekni aytmağa toqtamaycam, atta islâmdan qorqqanlar ve İslâm nurunı söndürmege tırışqanlar bunı eşitmekten nefret etse de, çünki olar, sahte qabaatlavlarnen apis cezasını çekip, qorquzmağa tırışalar, dep tüşüneler", — dep ayttı İbragimov.
İsmet İbragimov — faal ve arap tilini bilgen. Evli, üç qızı bar. Şimdi o Rusiyeniñ Dimitrovgrad şeerinde apis cezasını çekmekte.
2021 senesi fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.
«Memorial» aq qorçalayıcı merkezi «qırımlı musulmanlar davasınıñ» mabüslerini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
