Qırımda Rusiye polisiniñ hadimleri «kütleviy qanunsız tedbirlerde» iştirak etüv yasağına dair tenbi vesiqalarını bereler. Bu aqta «Qırım birdemligi» aq qorçalayıcı teşkilâtı haber ete.
«Uquq qoruyıcılar tarafından ziyaret etilgenler arasında siyasiy mabüsler Rustem Emiruseinov ve Arsen Abhairovnıñ esli-başlı ana-babaları, «Qırım birdemliginiñ» mühbiri Kulamet İbraimov, 64 yaşında Şadiye Qatıq, 61 yaşında Zera Satilvaldiyeva ve Yunus Veliyev bar. Episi bir qaç kün evelsi «Qurman gruppasından» üç qırımtatarınıñ tutuluvına bağışlanğan duağa barğan edi», – dep aytıla haberde.
Qayd etmeli ki, tenbi siyasiy mabüs Emil Ziyadinovnıñ yaşağan yerine de ketirildi. Ziyadinov Rusiye mahkemesi tarafından 17 yılğa üküm etilgen edi.
«Polis hadimi Emil Ziyadinovnen laf etmege istey, dep ayttı. Anası laf etip olamazlar dedi. O, sebebini soradı. O, apiste olğanını ayttı, soñra aylanıp ketti», – dep ayttı siyasiy mabüsniñ ömür arqadaşı Elviye Ziyadinova.
Aq qorçalayıcılar yazğanına köre, Rusiye uquq qoruyıcıları siyasiy mabüs Rustem Emiruseinovnıñ ana-babası Reşat ve Zure Emiruseinovlarğa da aynı vesiqalarnı ketirdi.
«Uçaq, dronlar uçqanını kördiñizmi dey, men uçaqlarnı kördim, qalğanını bilmeyim dedim. Soñra mahsus operatsiyağa (Rusiye akimiyeti Ukrayınağa qarşı cenkni böyle adlandıra – QA) qarşı teşviq etmege kelelermi dep sorağanlar», – dep tarif etti Emiruseinov.
«Bu tenbini Qırımdaki mustaqil jurnalist faaliyetine qarşı daa bir basqı ıntıluvı dep sayam, çünki 2014 senesinden berli mında olğanlarnı aydınlatamız. Menden ğayrı, daa altı qorantağa kelgenler. Bu meni toqtatmay, jurnalist faaliyetime tesir etmeycek», – dep izaatladı adiseni Kulamet İbraimov.
Qırımda Rusiye uquq qoruyıcıları faal Elmaz Akimovanı «qanun bozulmaycaq», dep tenbilegen edi. Daa evel Han sarayı yanında bir kişilik narazılıq aktsiyasından soñ onı tutqan ediler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
