Qırım yarımadasınıñ Rusiye tarafından işğalinden berli 31 insan ğayıp oldı, olarnıñ taqdiri aqqında malümat yoq. Olarnıñ çoqusı Qırımnıñ tamır halqınıñ vekilleri. Bu aqta Qırımtatar Resurs Merkezi haber ete .
Aq qorçalayıcılarnıñ malümatına köre, ğayıp olğanlar arasında 18 qırımtatar bar edi. Qırımtatar Resurs Merkezi derc etken cedvelde vatandaş faalleri ve arbiylerniñ adları bar.
"Şimdilik, bizim malümatımızğa köre, işğal etilgen Qırımda ğayıp olğanlar: Abduramanov Rizvan, Aliyev Arsen, Aliyev Server, Alâutdinov Marsel, Apselâmov Eskender, Aripov Şevket, Arıslanov Muhtar, Arsen Suyunov, Batırov Marat, Bondarets İvan, Vaşçuk Valeriy, Ganiyev Ruslan, Grişçenkov Sergey, Cepparov İslâm, Dubuşçak Andrey, Zinedin Seyran, İbragimov Ervin, İslâmov Cevdet, İsmailova Susanna, Kapliyenko Maksim, Klapova Yekaterina, Kobzar Anatoliy, Kostenko Feodor, Mangubi Saha, Platonov Oleg, Polüh Nataliya, Soliyev Farhad, Terekov Arlen, Platonov Oleg, Şaymardanov Timur, Şevketov Marlen", — dep qayd ettiler merkezde.
Aq qorçalayıcılar qayd eteler ki, Kremlniñ nezaretindeki Qırım akimiyeti bu ğayıp oluvlarnı tahqiq etmey. Aynı zamanda, BMT Baş Assambleyasınıñ Qararına binaen, bu topraqta insan aqlarına riayet etüv içün tam mesüliyet Rusiyege, işğalci devletke aittir.
"Qırımda tamır Qırımtatar halqı ve Ukrayina tarafdarı olğan faallerge basqı ve qorquzuv usulı olaraq qullanılğan insanlarnıñ apiske alınmasını, tutulmasını ve hırsızlanmasını takbih etemiz", — dep aytıla QRM-niñ beyanatında.
Ukrayina prezidentiniñ Qırım Muhtar Cumhuriyetindeki temsilciligi, 2025 senesi ilk qış ayınıñ 8-nde berilgen malümatqa köre, Rusiye Federatsiyası tarafından işğal etilgen Qırımda siyasiy sebeplerden eñ az 224 insan apiste tutula, dep bildirgen edi. Olardan 133 qırımtatar halqınıñ vekili.