Rusiye tahqiqatçıları, Aqmescitte tevqif astında bulunğan ağır hasta qırımtatar faali Edem Bekirovnıñ DNK-sını patron qutusında, patlayıcı maddelerniñ şeritinde ve bu şeyler olğan bel çantasında tapqanını iddia ete. Bu aqta, bir qaç ekspertiza neticelerine esaslanıp, jurnalist Anton Naumlük bildire.
Aynı vaqıtta patronlar ve patlayıcı maddelerniñ özünde onıñ izleri tapılmadı.
“Bekirovnıñ tükürigini eki kere alğan ediler: 2018 senesi dekabr 12-sinde Qırım FSB-sinde ve dekabrniñ 29-ında Aqmescit SİZOsında. Bu resmiy tedbir degil edi, onı bilinmegen ve asker urbası olmağan adam yapqan edi. Mudafaanıñ fikrince, tamam bu - Bekirovdan qanunsız alınğan DNK nümüneleri - patron ve patlayıcılarnıñ sarğılığında tapıldı. İsmail Ramazanovnıñ davasında kibi, yani oña patronlar tintüv vaqtında taşlap qoyulğanında, tahqiqat, eşyaviy delilniñ bütünligi bu sefer bozıp oturmadı”, - yazdı Naumlük Facebookta.
Jurnalistniñ malümatına köre, psihiatrik ekspertizasına binaen, Bekirovnıñ aqlı yerinde, dep qabul etildi.
Daa evel ağır hasta qırımtatar faali Edem Bekirov Kreml kontrolindeki Qırım Yuqarı mahkemesiniñ aprelniñ 26-nda olğan oturışuvda açlıqnı ilân etmek niyeti aqqında bildirdi.
Aprelniñ 26-nda Rusiye kontrolindeki Qırım Yuqarı mahkemesi Bekirovnıñ SİZOda qaluv müddetiniñ uzatılmasına qarşı imayesi bergen temyiz arizasını red etti. Edem Bekirov iyünniñ 12-ne qadar nezaret altında qalacaq.
Advokat İslâm Velilâyevniñ aytqanına köre, müvekkiliniñ sağlıq vaziyeti soñki vaqıtları daa beter ola.
Ukraina Yuqarı Radasınıñ insan aqları vekâletlisi Lüdmila Denisova Bekirov tibbiy teşkerüvge yollanmalı, dep bildirgen edi. Tibbiy teşkerüvden soñ berilgen insulin iñektsiyaları sebebinden allergiyası olğan edi.
