Link açıqlığı

Saatnıñ esas haberi

Qırımtatar faali Edem Bekirov açlıqnı ilân etecek ola, uzviyeti dayanamaz – advokat


Edem Bekirov, arhiv fotoresimi
Edem Bekirov, arhiv fotoresimi

Ağır hasta qırımtatar faali Edem Bekirov Kreml kontrolindeki Qırım Yuqarı mahkemesiniñ aprelniñ 26-nda olğan oturışuvda açlıqnı ilân etmek niyeti aqqında bildirdi. Amma onıñ uzviyeti buña dayanıp olamaz. Bu aqta aprelniñ 29-nda Bekirovnıñ advokatı İslâm Velilâyev Facebookta haber etti. Onıñ qayd etkenine köre, bu adımnıñ sebebi müvekkiliniñ sağlığı fenalaşqanı oldı.

«SİZO hadimleriniñ areketleri bunıñ sebebi oldı. On künden berli SİZOnıñ Tibbiy bölük hadimleri Bekirovğa insulin iñektsiyalarını yapa, qan şekerini ise baqmay. Soy-soplar şekerni teşkermek içün ekspress-testlerni bir qaç kere yollamağa tırıştı, faqat SİZO tibbiy bölüginiñ hadimleri çeşit sebepler uydurıp, olarnı qabul etmey», – dep yazdı Velilâyev.

Onıñ aytqanına köre, böyle vaziyet ciddiy aqibetlerniñ, şu cümleden ölüm sebebi ola bile. O, müvekkilinen soñki sefer körüşkende onıñ sağlıq vaziyeti aqqında hatırlattı: Bekirovnıñ yüzü şişti, qoñur benekleri peyda oldı, zornen areket ete edi, zornen nefes ala, bağrınıñ sol tarafı ağıra.

«Müvekkilim adından ketişatqa tesir ete bilecek er keske muracaat etem – meseleniñ tez vaqıtta al etilmesi içün yardım köstermege, Aqmescit şeerindeki №1 SİZO hadimleriniñ işkence sayılğan qanunsız areketlerini toqtatmağa rica etem», – dep qayd etti Velilâyev.

Aprelniñ 28-nde Ukraina sağlıq naziri vazifelerini eda etken Ulâna Suprun ağır hasta qırımtatar faali Edem Bekirov bir aftadan berli Aqmescit SİZOsında ilâc alamay, dep bildirdi.

«Aqayım dayanır, o, küçlüdir». Edem Bekirovnıñ ömür arqadaşı onıñ apiske alınması aqqında (video)
Bekleñiz, lütfen

No media source currently available

0:00 0:05:02 0:00

Aprelniñ 26-nda Rusiye kontrolindeki Qırım Yuqarı mahkemesi Bekirovnıñ SİZOda qaluv müddetiniñ uzatılmasına qarşı imayesi bergen temyiz arizasını red etti. Edem Bekirov iyünniñ 12-ne qadar nezaret altında qalacaq.

Advokat İslâm Velilâyevniñ aytqanına köre, müvekkiliniñ sağlıq vaziyeti soñki vaqıtları daa beter ola.

Ukraina Yuqarı Radasınıñ insan aqları vekâletlisi Lüdmila Denisova Bekirov tibbiy teşkerüvge yollanmalı, dep bildirgen edi. Tibbiy teşkerüvden soñ berilgen insulin iñektsiyaları sebebinden allergiyası olğan edi.

Rusiye kontrolindeki Aqmescitniñ Kiyev rayon mahkemesi silâ ve patlayıcı maddelerni saqlağanında qabaatlanğan Bekirovnıñ tevqif müddetini eki ayğa uzattı.

Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.

Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.

XS
SM
MD
LG