"Qırım musulmanları davası"nıñ mabüsi, siyasiy mabüs Muslim Aliyev kene ceza izolâtorında buluna. Bunı "Qırım birdemligi" cemaat birleşmesine ömür arqadaşı Naciye Aci-Mamutova haber etti.
Onıñ bildirgenine köre, ŞİZO-da Aliyev yanvarnıñ 30-nace bulunacaq.
"Yanvarnıñ 1-nde, 19 yıl apis dezasına mahküm etilgen siyasiy mabüs, "Zonatelekom" apishane telefon alâqası ile apayı Naciyenen bağlanıp, dekabrniñ 23-nden kene ceza izolâtorında bulunğanını bildirgen. Bundan soñ müddet defalarca uzatılğan, başta 7 künge, soñra daa 10 künge. Yanvarnıñ 16-nda erkek bildirgeni kibi, müddetni daa eki aftağa - yanvarnıñ 30-nace uzatqanlar", - dep yazıla bildirmede.
Aci-Mamutova, aqayı er keske destekleri i yazğan mektüpleri içün içün minnetdarlıq bildirgenini aytı.
Keçken sene, dekabr ayında aq qoruyıcılar, Aliyevni advokat onı yoqlağan soñ ceza izolâtorından yibrgenlerini haber etken eidiler.
Moskva vilâyetindeki (Rusiye) Vlasiha şeeriniñ Arbiy istinaf mahkemesi iyünniñ 25-nde Yaltadaki «Hizb ut-Tahrir davasınıñ» altı mabüsine çıqarılğan ükümni deñiştirmedi.
Rostov-na-Donu Cenübiy okrugı arbiy mahkemesiniñ qararınen Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa mahküm etildi.
Amnesty International aq qorçalayıcı teşkilâtı Yaltadaki «Hizb ut-Tahrir davasınıñ» bütün mabüslerini vicdan mabüsi dep adlandırdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
