Qırımda keçirilgen kütleviy tintüvlerden soñ apiske alınğan ve al-azırda Rusiye SİZOsında bulunğan qırımtatar faali İzzet Abdullayevniñ qızı doğdı, dep bildirdi advokatı Mammet Mambetov.
«Bugün Rostov vilâyetiniñ Şahtı şeerindeki SİZO-4-te müvekkilim İzzet Abdullayev ile körüştim. Tutulğanından berli, ne yazıq ki, bulunğan yerini tasdıqlaycaq bir malümat yoq edi, müvekkilim qayda olğanını bildirmek talabınen tahqiqat organlarına muracaat etken edim. Tahqiqatçı Ceza-protsessual kodeksini bozıp, alâ daa bir malümat bermedi. İzzetniñ maneviy alı pek güzel», – dep yazdı Mambetov Facebookta.
Onıñ aytqanına köre, qızı olğanına dair haber «elbette, quvet berdi». Advokatnıñ qayd etkenine köre, Abdullayevniñ ekinci qızı oldı.
Aprelniñ 8-nde qırımlı advokatlar Emil Kurbedinov, Edem Semedlâyev ve Mammet Mambetov apiske alınğan qırımtatar faallerinen körüşmek içün Qırımdan Rusiyeniñ Şahtı şeerine yol aldı.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Martnıñ 27-nde ve 28-nde Aqmescitniñ Kiyev rayon mahkemesi tutulğan faallerni apiske aldı.
Martnıñ 29-nda Rusiye uquq qoruyıcıları Qırımdaki tintüvlerden soñ qıdırılğan qırımtatar faali Edem Yayaçikovnı tutıp aldı.
Aqmescitniñ Bavurçı qasabasında keçirilgen tintüv vaqtında semetdeşlerine qoltutmağa kelgenlerden eki kişi Eskender Mamutov ve Emil Ziyadinov da tutuldı. Aqmescit mahkemesi Ziyadinovğa «politsiyağa qarşı çıqqanı içün» 500 ruble para cezasını berdi. Mamutov ise 5 künge apiske alındı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
Martnıñ 29-nda Qırımnıñ Rusiye ombudsmeni Lüdmila Lubina Qırım.Aqiqatqa bildirgenine köre, Qırımda tevqif etilgen 23 qırımtatar faalini Rusiyege alıp ketkenler.
