Ekinci Aqmescit “Hib ut-Tahrir davası”nıñ mabüsi Rustem Şeyhaliyevniñ advokatı Emine Avamileva müşterisiniñ sağlıq alı zayıflaşqanını bildire. Onıñ sözlerine köre, SİZO-da Şeyhaliyevden “ilâclarını tutıp alğanlar”.
Bu aqta Emine Avamileva “Qırım birdemligi” cemaat birleşmesiniñ faallerine aytıp berdi.
“Advokat Rustemniñ sağlığı zayıflaşqanını bildire. Giportonik krizis keçirgeni sebebinden FSB idaresiniñ tahqiqatçıları özü acele yardım çağırğanlar. Amma bu, tevqif müddetiniñ uzatılmasını istegen prokuror içün inandırıcı delil degil eken. Bundan ğayrı Krasnodarda Şeyhaliyevden ilâclarını tutıp aldılar, bunı SİZO-da ilâclar yardımınen özüni öldürüv vaqiaları olğanınen añttılar”, – dep haber ete “Qırım birdemligi”.
Avamilevanıñ qayd etkenine köre, Şeyhaliyevni “bütün vaqıt baş ağrısı raatsızlay ve onıñ ilâclarğa ihtiyacı bar”.
Soçiniñ Üçünci istinaf mahkemesi fevralnıñ 8-nde ekinci Aqmescitteki ekinci "Hizb ut-Tahrir davası"nıñ mabüsleri, grajdan jurnalistler Ruslan Suleymanov ve Rustem Şeyhaliyevniñ apiste tutuv müddetlerini uzatuv qararına qarşı advokatlarnıñ şikâyetini red etti. Olar SİZO-da qala.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Tutulğanlar arasında qırımtatar cemaat jurnalistleri Rustem Şeyhaliyev, Osman Arifmemetov ve Remzi Bekirov bar ediler.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
