Ukrayina Türkiyeden Moskvanıñ nezaretinde olğan Yaltanıñ akimiyet organlarınıñ bu memleketke seferini añlatmasını istey. İşğal memuriyetniñ yolbaşçısı Yanina Pavlenko ve şeer şurasınıñ başı Konstantin Şimanovskiy Türkiyege seferleriniñ neticesi olaraq yerli memurrlarnenola bilecek işbirlik aqqında ilân ettiler. Ukrayina TİN bu "vaziyetke büyük ciddiyliknen baqalar", Milliy Meclis ise oña "ciddiy protokol" deyler. Yalta memurları Türkiyege nasıl kelgenleri ve bunı nasıl añlamaq kerek olğanı aqqında Qırım.Aqiqat aytıp bere.
Yalta memurlarınıñ Türkiyege ziyareti Rusiyeniñ Qırımnı işğal etmesinden ve Rusiye akimiyetine sanktsiyalar qoyulmasından soñ ilk sefer belli oldı. Türkiye Qırım yarımadasınıñ Rusiye taarfından işğal etilmyesini tanımağan memleketelrden biridir.
Qırımdan "musafirler"
Yaltadan memurlarnıñ oktâbrniñ soñunda Türkiyege ketmesine baqmadan, bunıñ aqqında olar qaytqan soñ belli oldı.
Yaltanıñ Rusiye yolbaşçısı Yanina Pavlenko Telegram kanalında Türkiyede buluna, dep tasdıqladı. O, Beylikdüzü belediye yolbaşçısı, yerli ticaret-sanayı odasınıñ vekilinen körüşti, dep bildrdi. Rusiye kütleviy haber vastalarınıñ malümaına köre, eyyet erkânında Yalta Rusiye belediyesiniñ yolbaşçısı Konstantin Şimanovskiy de bar.
Ekisi de Ukrayina ve diger memleketelrniñ sanktsiyalar cedvelindeler.
Şartlarğa köre, "Birleşken şeerler ve yerli akimiyet" oturışlarında iştirak etecek namzetler oktâbrniñ 20-ne qadar kösterilmek kerek edi. Yani teşkilâtçılar tedbirniñ başlamasından eñ az altı kün evel işğal etilgen Qırımda vekiller kelecegini bilmek kerek ediler.
Yanina Pavlenkonıñ bildirgeni kibi, Türkiyege ziyaretniñ neticesi olaarq Yalta İstambulnıñ Beylikdüzü rayonı ile qardaş şeer olmağa azırlana.
"Faaliyetimizniñ saalarını ve yönelişlerini belgileymiz, bundan soñ anlaşma imzalanacaq, - dep bildirdi Pavlenko.
Beylikdüzü belediyeniñ akimiyeti bunıñ aqqında haber etmeyler.
TİN raatsız, media susa
"Birleşken şeerler ve yerli akimiyet" Bütün dünya teşkilâtınıñ resmiy resursları ve Könya belediyesiniñ saytı "Yalatadan delegatsiyanıñ" tedbirlerde iştirak etmesi aqqında haber etmey.
Ukrayina Tış işler nazirligi Türkiyeden Yalta Rusiye memuriyeti eyyetiniñ Türkiye ziyaretini añlatmasını rica etti, dep bildirdi Ukrayına Tış işler nazirliginiñ spikeri Oleg Mıkolenko.
«Belli ki, Rusiye işğalcileri Birleşken şeer ve yerli akimiyetlerniñ halqara teşkilât toplaşuvında iştirak etti, İstanbul şeeri Beylikdüzü ilçesi ile qardaş munasebetlerniñ añlaşması imkânını muzakere etti», – dep bildirdi Mıkolenko Facebookta.
Onıñ bildirgenine köre, Ukrayina müessisesi bu vaziyetke fevqulâde ciddiyetnen yanaşa ve Türkiye tarafına resmiy muracaatta bulundı.
«Halqara uquq normalarına köre, Qırım yarımadası Ukrayınanıñ bir qısmı ola, vaqtınca Rusiye tarafından işğal etildi. BM Baş Assambleyasınıñ qararı taraflardan Qırım statusını şübhege oğratacaq areketlerden, hususan işğalci memuriyetlernen, uzaq olmağa talap ete», – dep qoştı Mıkolenko.
Onıñ qayd etkenine köre, Ukrayına topraq bütünligine qoltutqan Türkiye akimiyeti Rusiye provokatsiyasına» kerekli cevap berir ve ileride tekrarlanmasına yol bermez.
"Qabul etilmyez ve ayıp vaziyet"
Qırımtatar Milliy Meclisiniñ reisi Refat Çubarov Yaltanıñ Rusiye memuriyeti eyyetiniñ Türkiye ziyaretini izaatlap, Türkiye memurları «Rusiye cinayetçilerini qara kirişten medeniy dünyağa çıqarmağa tırışa», dep ayttı.
«Qırımda Rusiye işğalcileri tamır qırımtatar halqına qarşı repressiya ve taqiplerni quvetleştire, nezaketli Türkiye memurları ise işğal etilgen Qırımdan Rusiye cinayetçilerini odalarında qarşılay ve 2014 senesi qırımlı satqınlar çıqarılğan medeniy dünyağa qara kirişten kirsetmege tırışa», – dep yazdı Çubarov Facebookta.
Onıñ bildirgenine köre, «Birleşken şeerler ve yerli akimiyetler» teşkilâtınıñ Dünya şurası vaqtında Rusiye işğal etken Yaltanı bu teşkilâtqa kirsetmek qararı alındı.
«Eñ kederlisi şu ki, iç bir Türkiye memurı, bu teşkilâtnıñ yolbaşçısı olğan Könya şeer yolbaşçısı bile, Rusiye tarafından işğal etilgen Qırımda yerleşken Yalta şeeri aqqında aytılğanını añlamadı. Amma tek Könya şeeriniñ yolbaşçısı bunı yapsa, o qadar kederli olmaz edi», – dep qayd etti Qırımtatar Milliy Meclisiniñ reisi.
Onıñ sözlerine köre, Qırımdan kelgen memurlarnıñ Türkiyedeki Rusiye delegatsiyasınıñ erkânında olmasını aselet gizlegenler ve bunıñ sayesinde olar bu memleketteki tedbirlerde iştirak etip olğanlar.
"Yüz bergenler Türkiyeniñ Ukrayinanıñ topraq bütünligine destek ve Rusiyeniñ Qırımnı işğal etme ıntıluvlarınıñ tanılması ile bağlı resmiy siyasetini aks etmey. Amma aynı zamanda Türkiye memurlarınıñ Rusiye delegatsiyasınıñ erkânında işğal etilgen Qırımdan olğan adamlarnı körmemesi kelecekte böyle ayıp vaziyetlerniñ olmaması içün semereli çareler körmemiz kerek manasına kele", - dep bildirdi o.
Kim mesüliyetli?
Qırımnıñ Rusiye akimiyeti temsilcileriniñ Türkiyege seferiniñ bütün alları malüm olmağanından sebep bu devletniñ olarnı qabul etmesi meszusındaki mesülietliginiñ ne derecede olğanı ile fikir yürsetmege qıyındır, dep qayd ete Halqara uquq eksperti Borıs Babin.
"Qırımnıñ işğal memuriyetiniñ temsilcileri ne yerden olğanlarını gizlemediler, misal olaraq, biz Voronejdenmiz demediler. Öz cinaiy vazifelerini de gizlemediler. Bunıñ içün büyük mesüliet tedbirniñ iştirakçilerindedir. Tedbirniñ teşkilâtçıları böyle insanlarnın davet etilmyesiniñ aqibetleri nasıl olacağanı añlamalılar. Ukrayina TİN buña narazılıq bildirgeni elbette yahşıdır, - dep ayttı o.
MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
