Rusiye quvetçileri Yaltadaki «Hizb ut-Tahrir davasınıñ» mabüsi Arsen Cepparovnıñ ömür arqadaşı Zarina Cepparova qayd olğan yerge «neofit» tedbirleri içün keldi. Qayd etilgenine köre, Zarina evlenmezden evel bu adreste yaşağan edi. Politsiya hadimleri Cepparovanı tapmayıp, qomşularını soraştırdı, dep bildire «Qırım birdemligi» advokat Lilâ Gemeciniñ malümatına esaslanıp. Oña qadın mesleat içün muracaat etti.
«Politsiya onı qayd olğan yerde tapmayıp, qomşularını soraştırdı. Angi dinni küte? İslâmnı ne vaqıt qabul etti? İslâm qanunlarına riayet etemi? Başı qapalımı? Ve qomşular onıñ aqqında ne ayta bile. Böyle tedbirler Qırımda artıq kütleviy şekilde keçirile. Bunıñ kibi ziyaretler aqqında diger haberler de kele», – dep tarif ete Gemeci.
Gemeciniñ fikirince, Qırımdaki Rusiye quvetçileriniñ bu yapqanları qanunsız ola, insanlar ise olarnıñ anayasa aqlarına tesir etken soraştıruvlardan vazgeçüv aqqı bar.
«Politsiya hadimleriniñ malümat almaq içün muracaat etken insanlar bir sebep aytmayıp, bu soraştıruvda iştirak etmekten vazgeçe bile. Bu olar içün mecburiy degil. Ve bir şey aytmazdan evel şunı hatırlamalı ki, şaatlıq yalan çıqsa, qanunlar çerçivesinde itiraz etilecek. Qayd etmek ister edim ki, Anâ (Bogaçeva, bu davanıñ daa bir mabüsiniñ ömür arqadaşı, oña da «neofit» tedbirleri içün kelgen ediler) ve Zarina metinliler, olar aqaylarına qarşı basqı, cinaiy taqip etilüvine dayandı ve olarğa qarşı da basqı ve taqiplerge dayanırlar», – dep qoştı advokat.
Hatırlatamız, Yaltadaki «Hizb ut-Tahrir davasınıñ» mabüsi Vadim Siruknıñ ömür arqadaşı Anna Bogaçovağa da Rusiye politsiyasınıñ hadimleri kelgen edi. Olar Rusiye kontrolindeki Qırım İç işler nazirliginiñ emri bar, dep bildirdi.
İyünniñ 25-nde Moskva vilâyetiniñ (Rusiye) Vlasiha şeerindeki Arbiy istinaf mahkemesi Yaltadaki «Hizb ut-Tahrir davasınıñ» altı mabüsiniñ ükmüni deñiştirmeyip qaldırdı.
Böylece, Rostov-na-Donu Cenübiy okrugınıñ arbiy mahkemesiniñ 2019 senesi qabul etken qararı deñişmedi. Mahkeme qararına köre, Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi. Olar sert rejimli koloniyada qalacaqlar.
Amnesty International aq qorçalayıcı teşkilâtı Yaltadaki «Hizb ut-Tahrir davasınıñ» bütün mabüslerini vicdan mabüsi dep adlandırdı.
Ukraina Tış işler nazirligi bu üküm sebebinden Rusiyege narazılıq bildirdi.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
