Link açıqlığı

Saatnıñ esas haberi

Rusiye Birleşken Milletlerde Qırımnıñ topraq mensüpligi meselesi «çoqtan qapatıldı», dep bildirdi


Rusiyeniñ BM vekili Dmitriy Lozinskiy BM Baş Assambleyasınıñ 76-ncı sessiyasınıñ birinci körüşüviniñ umumiy toplaşuvında Ukraina vekili çıqışta bulunğan soñ Qırımnıñ topraq bütünligi meselesi Moskva içün «çoqtan qapatıldı», dep bildirdi.

Lozinskiyniñ çıqışı Rusiyeniñ BM temsilciligi saytında derc etildi.

«Ukraina zenaatdaşlarımıznıñ Rusiye Federatsiyasına qarşı saçma ve esassız qabaatlavlarına cevap bermek içün cevap aqqı çerçivesinde kene söz alıp, qıymetli vaqtımıznı sarf etmege mecburmız. Ukraina eyyetini dünya toplulığını yañlış fikirlernen başını aylandırmaqtan ve ileride böyle mühtekirlik yapmaqtan saqındırmağa ister edik», – dedi o, çıqışınıñ başında.

Rusiye vekili qayd etkenine köre, Budapeşt memorandumına zıt bir şekilde Ukraina telükesizligi kefaletleri vazifeleriniñ bozulmasınen bağlı Moskvağa qarşı er angi qabaatlavlar «esassız ve Rusiyege qarşı bir propaganda ola».

O, bu vesiqa olıp keçken adise-vaqialarnen (2014 senesi Ukrainada olğan İtibar İnqilâbı – QA) bağlı olmağanından emin, Rusiye diplomatınıñ fikirince, bunıñ neticesi Qırım ilhaqı ve Donbastaki arbiy zıddiyet oldı.

Rusiye diplomatı Kyivni «Donetsk ve Lugansk temsilcilerinen dialog» qurmasına ve Minsk añlaşmalarına riayet etmesine çağırdı.

«Qırım statusını aytacaq olsaq, bu mesele bizim içün çoqtan qapatıldı. Qırım – Rusiye Federatsiyasınıñ bir parçasıdır», – dedi o, çıqışınıñ soñunda.

Ukraina prezidenti Volodımır Zelenskıy İsrail prezidenti İtshak Gertsog ile körüşip, Qırımnen bağlı yañartılğan qararlar Birleşken Milletlerge yılnıñ soñuna qadar berilecek, dep bildirdi. Zelenskıy, BM Baş Assambleyası Donbas ve Qırım meseleleri çezilecek meydançıqlardan biri ola, dep qayd etken edi.

Kreml, Rusiye 2014 senesi işğal etken Qırımnıñ topraq mensüpligi meselesi muzakere etilmeycek, dep bildirgen edi. 2014 senesi AB ve ABD Qırım işğali sebebinden Rusiyege qarşı sanktsiyalar kirsetti.

İyül ayında Rusiye prezidentiniñ matbuat kâtibi Dmitriy Peskov Qırım bir vaqıt «kelişme mevzusı olmaycaq», dep ayttı.

Ukraina Tış işler naziri Dmıtro Kuleba «Ukraina Rusiyeni Qırımdan çıqaracaq», «Qırım platforması» ise buña yardım etecek, dep aytqan edi.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

«Qırım platforması»

Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.

2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.

Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.

Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.

2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.

Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.

Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.

XS
SM
MD
LG