Ukraina Tış İşler Nazirliginiñ birinci müavini Emine Ceppar, Rusiyeniñ ilhaq etilgen Qırım sakinleriniñ qorquzuv siyaseti devam ete, dep qayd etti.
Böylece Ceppar iyün 22-sinde Yalta "Hizb ut-Tahrir davası" iştirakçileriniñ ükmüne apellâtsiya şikâyetiniñ baqıluvı boyunca rusiyeli mahkeme oturışını izaat etti.
"Rusiye 2014-ünci yıldan berli Qırımda "terrorcılarnı" qıdıra... em de tapa. Böyleliknen o "islâm ekstremizmi" uydurmasını tamamlay ve qaramancasına onen küreşe. Böyle etip Rusiye Qırımdaki vatandaşlarımıznı qorquza. İyün 22-sinde mahkeme qararlarına apellâtsiya boyunca mahkeme oturışını keçirgende, bizge kene rejissörlıq ve sanalaştırma qabiliyetler numayış etildi: Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi", - qayd etti Ceppar Facebookta.
O, Rusiye baş arbiy prokurorına mektüp yazmaq aktsiyasına qoşulmağa çağırttı.
İyün 22-sinde Rusiyeniñ Vlasiha şeeriniñ İstinaf arbiy mahkemesi Yaltadaki «Hizb ut-Tahrir davasınıñ» ükmüne qarşı istinaf baqılmasında 2020 senesi iyünniñ 25-ne qadar teneffüs yaptı.
Amnesty International aq qorçalayıcı teşkilâtı Yaltadaki «Hizb ut-Tahrir davasınıñ» bütün mabüslerini vicdan mabüsi dep adlandırdı.
Ukraina Tış işler nazirligi bu üküm sebebinden Rusiyege narazılıq bildirdi.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
