Rusiye, işğal etilgen Qırımda etnik gruppalar, hususan qırımtatarlar ve ukrainlerniñ ayırımı maqsadınen qanunlarnı qullanmağa devam ete. BM ırq ayırımını yoq etüv Komitetiniñ tevsiyeleri körmemezlikke urula, dep aytıla «Memorial» Rusiye aq qorçalayıcı merkeziniñ haberinde.
«Komitet ekspertleri, Rusiye ükümetini İnsan aqları Yuqarı komissarına vaziyetniñ monitoringi içün Qırımğa kirmesine izin bermesine daa bir kere çağırdı. Komitetniñ qayd etkenine köre, Qırımda vatandaşlıq, ukrain tilini ögrenüv, din cemiyetleriniñ qayd etilüvi ve qırımtatar idare organları, hususan Meclis faaliyeti mesellerinde etnik gruppalar ve tamır halqlarnı ayırımğa oğratqan qanunlar qullanıla ve memuriy tedbirler alına», – dep aytıla haberde.
Merkezniñ qayd etkenine köre, Rusiye, qırımtatarlarnıñ aqlarını bozğan, hususan insanlarnı hırsızlağan, tutqan ve insaniyetsiz yanaşqanlarnı mesüliyetke çekkeni ve tahqiqat keçirgenine dair malümat bermedi.
Qırım aq qorçalayıcı gruppasınıñ idare reisi Olga Skripnik Qırım.Aqiqat Radiosına bildirgenine köre, Qırımnıñ Rusiye akimiyeti yarımada sakinleriniñ malümat aqqını muntazam sürette boza.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
