Link açıqlığı

Saatnıñ esas haberi

Rusiye qırımlılarnıñ malümat aqqını muntazam sürette boza – aq qorçalayıcı


Qırım aq qorçalayıcı gruppasınıñ idare yolbaşçısı Olga Skripnik
Qırım aq qorçalayıcı gruppasınıñ idare yolbaşçısı Olga Skripnik

Rusiye akimiyeti işğal etilgen Qırım sakinleriniñ malümat aqqını muntazam sürette boza. Bu aqta Qırım aq qorçalayıcı gruppasınıñ idare yolbaşçısı Olga Skripnik Qırım.Aqiqat Radiosınıñ intervyüsında bildirdi.

«O, (malümat aqqı – QA) er vaqıt çeşit şekillerde bozula. Eñ parlaq misallerden biri – çeşit saytlarnıñ blok etilüvi. Bütün sayt da blok etilmesi mümkün, misal içün, «Ukrayınska pravda». Ya da Qırımtatar Milliy Meclisiniñ saytı, onı Meclis yasağı qararı sebebinden blok eteler», – dep tarif etti Skripnik.

Onıñ malümatına köre, farqlı zamanlarda Qırımda 30-ğa qadar ukrain saytı blok etile.

«Ağda olğan er angi malümat saña qarşı qullanıla bile. Em de Qırım kibi zıddiyet alanı ve işğal etilgen topraq aqqında aytsaq», – dep ayttı aq qorçalayıcı.

Olga Skripnik yarımadada aqlar bozulsa, insanlar tutulsa ya da tintüvler keçirilse, içtimaiy ağlarnı qullanmaq müim olğanını qayd etti.

«Sıq-sıq içtimaiy ağlar eñ tez mehanizmlerden biri ola. Bu aletni qullanmağa devam etiñiz, bu kerçekten müim. Bizim içün, aq qorçalayıcılar içün, o bazı vaqıtları yekâne yipçik ola, olıp keçkenlerni bilemiz», – dep ayttı o.

İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.

XS
SM
MD
LG