Rusiye Qırımda özek arbiy potentsialını arttıra, dep bildirdi Ukraina Tış işler naziri Dmıtro Kuleba. Bu aqta o, Foreign Affairs amerikan neşiri içün yazğan maqalesinde ayttı.
«Rusiye mında (Qara deñiz regionında – QA) daa agressiv ola: o, ticaretke ve deñiz seyaatlarına mania ola, işğal altındaki Qırımda adiy ve özek arbiy potentsialını arttıra, onıñ toprağını Yaqın Şarqtaki arbiy faallik içün logistik hab olaraq qullana», – dep aytıla maqalede.
Ukraina prezidentiniñ Qırım Muhtar Cumhuriyetindeki vekiliniñ muavini Tamila Taşeva Qırımda özen silâsını yapmaq içün bir qaç obyektte malzemeler bar, dep qayd etken edi.
Bundan ğayrı, Ukraina Tış işler naziriniñ birinci muavini Emine Ceppar «Ukraina 30» umumukrain forumınıñ toplaşuvında Rusiye işğal etilgen Qırımda özek silâsını yerleştirmek içün infrastrukturasını abadanlaştırmağa devam ete, dep ayttı.
Rusiyeniñ işğal etilgen Qırımda özek silâsını ğayrıdan tiklegenini Ukraina halq deputatı, qırımtatar halqınıñ lideri Mustafa Cemilev de bildirgen edi.
Rusiye akimiyeti Kulebanıñ aytqanlarını daa izaatlamadı.
2018 senesi oktâbr ayında o vaqıt Ukraina Tış işler naziri olğan Pavlo Klimkin Rusiyeniñ Qırımda özek silâsını yerleştirgenine ya da onıñ içün infrastruktura qurğanına dair şübheler bar, dep aytqan edi.
Rusiye Devlet dumasınıñ Qırım deputatı Andrey Kozenko Klimkinniñ aytqanlarını izaatlap, «RİA Novosti» neşirine «qomşu memleketniñ natsist reberligi qorqusınıñ sebepleri bar», dep ayttı.
1994 senesi Ukraina özek silâsından vazgeçti. Ukraina, ABD, Rusiye ve Büyük Britaniya Ukrainanıñ Özek silâsınıñ tarqatılmamasına dair añlaşmağa qoşulğanınen Telükesizlik kefaletleri memorandumını tizdi. Andaki maddeler Ukrainağa suverenitetini ve telükesizligini kefil ete.
