Rusiyedeki Cenübiy bölgeniñ arbiy mahkemesi «Qırım musulmanları davası»nıñ mabüsi 58 yaşındaki Azat Eyupovnıñ tevqif müddetini 2021 senesi martnıñ 28-nece uzattı. Bunı «Qırım birdemligi» cemaat birleşmesi haber etti.
«Mahkeme devlet qabaatlayıcısınıñ muracaatını qanaatlendirdi. Akis alda, mahkemelengen cinayet faaliyetini devam ete bilir, cinayet davasına mania ola bilir, dava boyunca delillerni yoq ete bilir ve tahqiqattan gizlene bilir eken. Prokuror Sergey Aydinov qayd etti ki, mahkemelengenniñ qabaatı pek ağır eken: o, cуmaat telükesizligine, devletke ve RF anayasasına qarşı areket etkeninen qabaatlana», – dep yazıla bildirmede.
Mudafaa tarafı muracaat esassız olğanını bildirdi. Tayin etilgen advokat Biyaminova, müvekkiliniñ apayı, qorantası ve çağına yetmegen saqat qızı olğanını köz ögüne almağa rica etti.
Dava boyunca nevbetteki mahkeme oturşı 2022 senesiniñ başında olacaq.
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi. Tahqiqat tedbirleri keçirilgende tutulğan insanlarnıñ tuvğanlarına berilgen malümatqa köre, olar Rusiye Ceza kodeksiniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv – muar.) qabaatlana.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
