Ukraina prezidentiniñ temsilcisi Sergiy Nikiforov jurnalistlernen laf etken zaman, Rusiyeniñ BMT-daki delegatsiyası BMT BA şimdiki sessiyasınıñ kün tertibinden Qırımdaki vaziyetniñ muzakere etilmesini lâğu etmege teklif etkenini bildirdi.
«Yetmiş altıncı Baş Assambleyanıñ kün tertibi içün rey berme pek müim edi. Rusiye Ukrainanıñ şarqındaki ve Qırımdaki vaziyet ile bağlı maddeni kün tertibinden çıqarmağa tırıştı. Rusiye bunı yapıp olamadı – 71 memleket qarşı çıqtı», – «Suspilne» Nikiforovnıñ aytqanlarından alıntı ketire.
BMT Baş Assambleyası Donbas ve Qırım meseleleri çezilecek meydançıqlardan biri ola, dep tüşüne Ukraina prezidenti Volodımır Zelenskıy.
Ukraina Tış işler naziri Dmıtro Kuleba Volodımır Zelenskıynıñ BM Baş Assambleyasınıñ sessiyasında iştirak etmek içün ABDge kerçekleştirecek ziyareti vaqtında «bütün muzakerelerde Qırım qırmızı yip» olacaq, dep bildirgen edi.
BM Baş Assambleyası yetmiş altıncı sessiyasını sentâbrniñ 14-nde açtı. BM Baş Assambleyasınıñ umumiy munaqaşaları sentâbrniñ 21-nden sentâbrniñ 27-ne qadar keçirilecek.
Sentâbrniñ 9-nda BM Baş Assambleyası «Ukrainanıñ vaqtınca işğal etilgen topraqlarındaki vaziyet» maddesini saqlav qararına ve onı Baş Assambleyanıñ 76-ncı sessiyası kün tertibiniñ leyhasına kirsetüvge qoltuttı.
Sentâbrniñ 2-nde Birleşken Milletler, Baş kâtibi António Guterresniñ Qırım ve Aqyarda insan aqlarınıñ bozuluvına dair yañı maruzasını aydınlattı. Vesiqada qayd etilgenine köre, BM Baş kâtibiniñ maruzası 2020 senesi iyülniñ 1-nden 2021 senesi iyünniñ 30-na qadar müddetni qavrap ala ve «insan aqları ve halqara gumanitar uquq bozuluvlarını tarif ete».
