Ukrainanıñ PACE-deki delegatsiyasınıñ azası Öleksiy Gonçarenko, Rusiye tarafı Parlament Assambleyasından Dnipro suvunıñ Şimal Qırım kanalı ile Qırımğa berilmesiniñ toqtatılması ile bağlı mevamını bildirmesini talap etkenini haber etti. Ukraina millet vekili PACE-deki Rusiye delegatsiyasınıñ reberi Pötr Tolstoynıñ mektüplerine atfı ete. Gonçarenko olarnı içtimaiy ağlarda yayınladı.
«Tolstoy Ukrainanı Qırım içün Dniprodan suvnıñ kesilmesini «Qırım sakinlerine siyasiy mevamları içün kollektiv ceza» olğanında qabaatladı. Daa da alçaq ne ola bile. Tolstoy, Ukrainanıñ bozğan bir sıra şartnamege ve qırımtatarlarnıñ vaziyeti qıyın olğanına atfı ete», – dedi Gonçarenko.
Tolstoynıñ Rusiye delegatsiyasınıñ PACE-ge talapları aqqında tefsirleri yoq.
Rusiye Federal toplaşuvınıñ Federatsiya Şurasınıñ saytında Rusiye parlament azaları Assambleyanıñ işinde uzaqta iştirak etecegi aqqında yazıla. Aynı zamanda, bildirmede Rusiye tarafınıñ çarşenbe künü baqılacaq qırımtatarlarnıñ aqlarına riayet etilmyesine dair qararnıñ muzakere etilmesinde iştirak etmege azır olğanı yazıla.
«PACE-deki zenaatdaşlarımıznen konstruktiv qarşılıqlı faaliyetke azırmız ve sessiyanıñ esas muzakerelerinde iştirak etmege azırmız», – dep bildirdi PACE-deki Rusiye delegatsiyasınıñ senato qısmınıñ reberi Sergey Kislâk.
O, «Rusiye ile bağlı meselelerniñ aman-aman kün tertibinde olmağanını ve onen bağlı munaqaşalar sırf qırımtatarlarnıñ aqlarına riayet etilmesine dair qararnıñ muzakeresi vaqtında olacağına» diqqat çekti.
Крым, засуха и ее последствия. Хроника водного кризиса в фотографиях (фотогалерея)
İyünniñ 21-nde, bazarertesi künü, Avropa Şurası Parlament Assambleyasınıñ yaz sessiyası başlana. Kün tertibinde – Rusiye işğal etken Qırımda qırımtatar halqınıñ aqlarınıñ qorunmasına dair qarar.
