İyünniñ 21-nde, bazarertesi künü, Avropa Şurası Parlament Assambleyasınıñ yaz sessiyası başlana. Kün tertibinde – Rusiye işğal etken Qırımda qırımtatar halqınıñ aqlarınıñ qorunmasına dair qarar.
Bunıñ aqqında PACE saytında haber etile.
Qararda, hususan, aşağıdakiler talap etile:
- Qırımnıñ qanunsız işğalini lâğu etmek;
- işğalni tenqit etken siyasiy faallerniñ ölümi ve ğayıp olması ile bağlı tam ve şeffaf bir araştırma keçiremek;
- mustaqil medianı qapatmaq içün yapılğan tazyıq ve tehditlerni toqtatmaq ve ATR qırımtatar telekanalınıñ işini yañartmaq;
- qırımtatar müessise ve teşkilâtlarğa qarşı tazyıq ve taqiplerni toqtatamaq;
- Qırımtatar Milliy lideri Mustafa Cemilev ve Qırımtatar Milliy Meclis reisi Refat Çubarovğa Qırımğa qaytmağa ve memuriy sıñırdan serbet kemçege izin bermek;
- qırımtatar ve ukrainlerniñ aqlarına riayet etmeni temin etmek.
Ukrainanıñ delegatsiyası, Rusiye bu qararğa müsbet rey bermesiniñ qarşısını alacağını bekley.
«Qararnıñ baqılması başqa vaqıtqa qaldırılmaması biz içün pek müim edi. Bu mevzuğa qaytmaq müim bir ğalebedir, çünki Qırımdaki işğal organlar tarafından qırımtatarlarnıñ aqlarınıñ bozulması alâ daa devam ete, adamlarnıñ qoruv ve adaletke ihtiyacı bar. Rusiye delegatsiyası müsbet rey berilmesine keder etecegini bekleymiz», – dep yazdı Facebookta PACE-deki daimiy temsilcilikniñ azasınıñ muavini Yevgeniya Kravçuk.
