Rusiye politsiyası Qırımnıñ İçki rayonındaki Savurçı köyüniñ camisine keldi. Bu aqta «Qırım birdemligi» cemaat birleşmesi bildire.
«Kâğıttan «Vicdan ve diniy birleşmelerniñ serbestligi» Federal qanunından «Missionerlik faaliyetini keçirüv nizamına» dair 24.2 maddeni oqudılar. Şimdi A4 kâğıtında cami imamınıñ aytqanlarını yaza, onıñnen laf eteler», – dep tarif etti faallerge köy sakini.
Rusiye uquq qoruyıcı organlarınıñ vekilleri vaziyetni şimdilik izaatlamadı.
Rusiye quvetçileriniñ ziyaret sebepleri de belli degil. Qırım.Aqiqat, tafsilâtlı malümat almağa tırışa.
Qırımnıñ Rusiye prokuraturası aqmescitli imam Rasim Dervişevge qarşı memuriy dava açqan edi. Qararğa köre, o, cuma namazını qıldırıp ve vaaz etip qanunnı bozdı. Rusiye kontrolindeki Aqmescitniñ Mirovoy mahkemesi «qanunsız missionerlik faaliyeti» sebebinden Dervişevge 5 biñ ruble para cezasını berdi.
